Platformê Ked û Demokrasî yê Semsûr, Riha, Dîlok û Meletî serrgêra 11. de qurbanê Qirkerdişê Garê Ankara vîr ardê. Eşkerayîyan de ame dîyar kerdene ke do waştişê qurbanan yê ked, aştî û demokrasî bîyarê ca. Venga îqtîdarî zî ameye dayene ke berpirsîyaranê raştikênan vejo meydan.
SEMSÛR
Platformê Ked û Demokrasî yê Semsûrî seba Qirkerdişê Ankara Qada Bajarî ya Semsûrî de eşkerayîyêk daye. 10ê teşrîna verêna 2015î de verê Garê Ankara de, mîtîngê “Ked, Aştî û Demokrasî” de bi hêrişêko bombeyin yê DAÎŞ’î de 104 kesî ameybî qetilkerdene û 500î ra zêdeyêr kesî birîndar bîbî. Endam û rayberê partîyanê sîyasîyan, sazgehê demokratîk ê komelkî û xeylî kesî tewrê eşkerayîye bîyî. Pankartê “Ma kiştoxan nas kenê, nêverdanê ke vîrî ra şêro” ameye akerdene; sloganê “Ma 10ê Teşrîna Verêne vîrî ra nêvejenê” û “Şer ney, nika aştî” ameyê berzkerdene.
‘Derdê zerrîya ma sey roja verêne newe yo’
Hemsereka SES’î Rengîn Husnîye Kilinçe ser nameyê platformî eşkerayîye wende. Kilinçe dîyar kerd ke serê qirkerdişî ra 11 serrî vîyartê la derd û hêrsa înan sey roja verêne newe ya. Goreyê aye no hêriş tena vera mîtîngî nêbî; vera waştişê aştî, wayûbirayîye û cuya hempare ya heme şaran ame kerdene.
‘Aştîya daîmî bi edalet û sîyasetêko demokratîk mumkun a’
Kilinçe bale ante rewşa sîyasî û prosesî ser o: “Aştîya raştikêne û daîmîye tena bi bêvengkerdişê çekan nêbena. Seba çareserîya meseleya kurdan û aştîyêka daîmîye, herindê sîyasetanê înkar û emnîyetî de awankerdişê zemînêko demokratîk yê sîyasetî, heqê bingeyênî û hemwelatijîya seyyewbînîye lazim ê.”
‘Îqtîdar berpirsîyarîya xo red keno’
Kilinçe bale ante muhakemekerdişê dosyaya qirkerdişî ser o û dîyar kerd ke heme melumatanê îstîxbaratî reyde zî berpirsîyar û rayberê raştikênî nêameyê muhakemekerdene. Kilinçe qiseykerdişê xo wina qedêna: “Redkerdişê berpirsîyarîya dewlete endîşeyanê emnîyetê çalakîyanê demokratîkan yê ameyoxî zî zêde keno. Ma do têkoşînê xo yê ked, aştî, azadî û demokrasî gird bikerê; 10ê Teşrîna Verêne vîrî ra nêvejenê. Ma do rayîrê embazanê xo yê qetilbîyayan de têkoşînê edaletî dewam bikerê.”
Eşkerayî bi çepikan û berzkerdişê sloganan qedîya.
DÎLOK
Platformê Ked û Demokrasî yê Dîlokî zî seba vîrardişê qurbananê Qirkerdişê 10ê Teşrîna Verêne Parka Yeşilsu ya qezaya Şahînbeyî de eşkerayîyêk çapemenîye ya girseyî rê daye. Çalakîye de fotografê qurbanan û pankartê “Ma şîn de yê, ma nêverdanê ke vîrî ra şêro” ameyê berzkerdene. Çalakîye bi deqîqeyêk rêzegirewtiş dest pêkerd.
Serekê Şûbeya Egitim Sen’î ya Dîlokî û Hemverfekê yê Platformê KESK’î yê Dîlokî Omer Parlakçî ser nameyê platformî rê eşkerayîye wende. Parlakçî bale ante na ser o ke qirkerdiş nêame roşnkerdene û dîyar kerd ke heta ke berpirsîyaran ra hesab nêro persayene, têkoşînê înan do dewam bikero.
Eşkerayî bi sloganan qedîya.
RIHA
Platformê Ked û Demokrasî yê Rihayî zî verê cû goristanî zîyaret kerdî, dima meydanê bajarî de eşkerayîyêka çapemenîye daye.
Qurbanî Nilgun Çevik, Başak Sidar Çevik û Yilmaz Elmascan Goristanê Asrî yê Pirsûsî û Goristanê Dewa Sergena Qijkeke de ameyê vîr ardene. Keyeyê qurbanan û xeylî hemwelatijî tewrê programî bîyî; seba qurbanan rêze ame girewtene û qerenfîlî mezelanê înan ser o ameyê ronayene.
‘Hêrişêk bî vera aştîye’
Badê zîyaretî kome şîye merkezê Riha û verê AVM’yê Novada Park de eşkerayîyêka çapemenîye daye. Metnê eşkerayîye hetê Hemserekê Şûbeya Egitim Sen’î ya Rihayî Murat Oruçî ra ame wendene. Oruçî dîyar kerd ke 10ê Teşrîna Verêne tena qirkerdişêk nîyo û wina va: “No hêrişêko nemerdane bî ke vera ê kesan ame kerdene ke wazenê nê erdan de aştîyêka daîmîye awan bikerê; ê kesan ke şerî ra zêdeyêr muzakere û çekî ra zêdeyêr dîyalog pawenê.”
Çalakîye bi berzkerdişê sloganan qedîya.
MELETÎ
Platformê Ked û Demokrasî yê Meletîyî zî seba vîrardişê qurbanan eşkerayîyêk daye û qirkerdiş şermezar kerd. Kome verê Ocaxa Weşîye ya Ozalperî ya qezaya Battalgazîyî de amê têhet û heta verê Abîdeya Aştîye rayîr ra şîyê; uca eşkerayîyêka çapemenîye ameye dayene. Metnê eşkerayîye ser nameyê kome ra hetê Hemsereka SES’î ya Meletî Cansu Kaplane ra ame wendene.
Eşkerayî bi berzkerdişê sloganan qedîya.
