Koordînasyonê Kongra Star dîyar kerd ke hedîseyê Hesekê sîyasetanê hêzanê zereyî û teberî ra girêdayeyî yê. Nê hêzî wazenê herême ser o tesîr û îqtîdarê xo awan bikerê. Koordînasyonî venga hişyarîye da vera sîyasetanê fitne û dişmenîye.
Koordînasyonê Kongra Star seba hedîseyanê Hesekê eşkerayîyêk weşana. Koordînasyonî eşkerayîye de bale ante sîyasetanê tayê hêzan ser o ke wazenê mîyanê şaranê Sûrîye de îxtîlafan virazê.
Eşkerayîye de ame vatiş ke averşîyayîşê tehlukeyinî yê Hesekê tesadufî nîyê; nê averşîyayîşî serrgêra Komployê Mîyanneteweyî yê 9ê teşrîna verêne de qewimîyenê: “Averşîyayîşê hedîseyan yew bi yew û weçînayîşê na roje mojnenê ke zihnîyetê Komployê Mîyanneteweyî yê 9ê teşrîna verêne hema ganî yo û nê hedîseyî hetê eynî hêzan ra yenê tehrîkkerdiş. Têmîyanekîyê ke bajarî de her ke şona zêde benê, hêrişê vera sivîlan û hêrişê ke taxanê kurdan kenê hedef, cuya hempare ya şaran û emnîyetê herême kenê binê tehlukeyî. Hereketê komanê çeteyan yê çekdaran ke cayanê sey Şedade, Dêrazor û Reqa ra yenê ardiş û ver bi Hesekê yenê erşawitiş, cehdêko cidî yê provokasyonî yo.”
Goreyê eşkerayîye, Hesekê bajarêk adetî nîyo: “Hesekê merkezêko stratejîk o ke estbîyayîşê tarîxî yê şarê kurdan tede xurt o. Kurd, ereb û şarê bînî tede pîya ciwîyenê û verê cû neticeyê giranî yê sîyasetanê erebkerdişî tede ciwîyayê. Şerê vera DAÎŞ’î de Hesekê merkezanê muhîman yê operasyonanê xeta Hesekê, Reqa, Dêrazor û Şedade ra yew bîyo û rolêko muhîm kay kerdo. Averşîyayîşê ewroyinî cehdê heyfgirewtişê hêzan ke şerê vera DAÎŞ’î de bin kewtî û cehdê xirabkerdişê têkilîyanê mîyanê şaran ê.”
Eşkerayîye de ame dîyarkerdiş ke averşîyayîşê Hesekê tena sey krîzêk herêmkî nêeşkenê bêrê erjnayîş: “Ganî vera sîyasetanê hêzan ke wazenê şerê Sûrîye reyna xorîn bikerê, taybetî vera sîyasetanê zihnîyetê kehanê Baasî hişyar bê. Nê sîyasetî bi şuxulnayîşê komanê çekdaran û krîzanê komelkîyan komel parçe kenê û şaran kenê dişmenê yewbînan. Eke hesasîyetê tarîxî yê şaran bêrê îstîsmarkerdiş û dişmenîyê neweyî bêrê afirnayîş, no do îstîqbalê Sûrîye rê xirabîya tewr girde bo û heme herême do neticeyan giranan reyde rîbırî bimano ke telafî nêbenê.” Ame dîyarkerdiş ke vindertişê vera sîyasetê pêkewtişî tena berpirsîyarîya kurdan yan ereban nîya, berpirsîyarîya hempare ya heme şaran a.
Eşkerayîye de venga berpirsîyaranê Sûrîye zî ameye dayîş: “Awankerdişê emnîyetî yê Hesekê, pawitişê sivîlan û kontrolkerdişê hereketê komanê çekdaran berpirsîyarîya hukmatî ya. Ganî eşkera bibo ke konvoyê çeteyan bi kamcîn şertan û bi kamcîn destûran Şedade û Dêrazorî ra resayî Hesekê û çira ameyîşê înan ver bi taxanê kurdan nêame vindarnayîş. Hukmat nêeşkeno tena seyrê berzbîyayîşê têmîyanekîyanê mîyanê şaran bikero.” Koordînasyonî peynî de venga heme şaranê Rojavayî, hêzanê demokratîkan yê Sûrîye, rêxistinanê cinîyan û rêxistinanê komelê sivîlî da: “Wayîrvejîyayîşê helwestî vera sîyasetanê fitne û dişmenîye ke Hesekê de yenê averberdiş, seba ma wezîfeyêko tarîxî yo. Seba ke pêkewtişêk Hesekê de dest pênêkero û heme herême de vila nêbo ganî her kes bi berpirsîyarîye hereket bikero.”
