TJA û DBP’yî derheqê Komployê 9ê teşrîna verêne de eşkerayîyê nuştekî pare kerdî. Eşkerayîyan de ame vatiş ke komployê 9ê teşrîna verêne hereketêkê konjonkturelî yê sîyasetê teberî nîyo; dewamê tarîxî yê konseptê qirkerdiş û tasfîyeyî yo ke 1925î ra nat cografyaya Kurdîstanî de yeno ramitiş.
Komployo Mîyanneteweyî yê vera Rayberê Şarê Kurdî Abdullah Ocalanî 9ê teşrîna verêna 1998î de dest pêkerd û heta 15ê sibata 1999î dewam kerd. Nê 129 rojan de Ocalan şi 5 welatanê cîyayan û vera komployî 14 dewletan reyde têkoşîya. TJA û DBP’yî medyaya dîjîtale ser o eşkerayîyê nuştekî pare kerdî.
‘Yeno waştiş ke şerê kurd û tirkan bibo perçeyê seserra newîye’
TJA dîyar kerd ke seserra vîyarte de awankerdişê dewletanê neteweyî yê Rojhelatê Mîyanênî û Mezopotamya, sîyasetê înkarî û mudaxeleyê stratejîkî yê hêzanê hegemonan, ewro sebebê bingeyênî yê krîzanê xorînan yê herême yê. TJA wina vat: “Komployê mîyanneteweyî ke 9ê teşrîna verêna 1998î de vera Rayber Apoyî ame destpêkerdiş, xalanê tewr krîtîkan yê na xeta tarîxîye ra yew o. Zihnîyetê hegemon yê mîyanneteweyî waşt ke cigêrayîşê estbîyayîşî, îradeyê azadîye yê şarê kurdan û modelê alternatîf yê cuya seyyewbînîye tasfîye bikero; nê pêro kesayetîya Rayber Apoyî de bîbî yew. Çarçewaya modernîteyê kapîtalîst û planê Şerê Dinya yê Hîrêyinî de yeno waştiş ke şerê kurd û tirkan bibo perçeyê seserra newîye û şarê herême mîyanê çemberêkê şerê daîmî û krîzan de bêrê girêdayîş.”
‘Ma do heme neticeyanê komployî meydan ra wedarê û aştîya demokratîke awan bikerê’
TJA îfade kerd ke vera komployî êdî wext wextê cinîyan o: “Komployî dînamîkanê bingeyênan ra yew kerdo hedef: Xeta Azadîya Cinîye ke Rayber Apoyî teorîze kerda û hêzê vurnayîşê komelkî yê na xete. Ma eşkera vanê ke cigêrayîşêko aştîye ke cinî tede sey xoser ca nêgêrê û îrade û rengê înan yê sîyasî tede nêro dîyayîş, tu wext cewabêko komelkî yo daîmî nêdano. Cinîyê ke barê giran yê şerî û sîyasetanê bêçareserîye gênê milê xo ser, ganî prosesê muzakere û awankerdişê aştîye de bibê aktorê qerardayîşî. Qedênayîşê rejîmê tecrîdî yê vera Rayber Apoyî û awankerdişê şertanê azadîya ey ya fîzîkîye firsendêko bêemsal yê aştîya herêmkî û komelkîye yo.”
‘Ganî estbîyayîş û nasnameyê şarê kurdî bikewê bin garantîya destûrî’
DBP’yî zî dîyar kerd ke rol û mîsyonê 9ê teşrîna verêne û neticeyanê ey qebul nêkeno; nê neticeyî ewro bi şeklanê cîyayan yenê domnayîş. DBP’yî wina vat: “Ma vanê ke Birêz Ocalan, ke afirnayox û pêşengê Prosesê Aştî û Komelê Demokratîkî yo, ganî tewr nêzdî de bireso şertanê ke bieşko azad biciwîyo û bixebitîyo. Rayber Ocalan vano ke ganî têkilîyê kurd û tirkan bingeyê heqîqetanê tarîxî ser o newe ra bêrê awankerdiş û Tirkîya bibo wayîrê nîzamêkê huqûqî yê demokratîkî. Ganî estbîyayîş û nasnameyê şarê kurdan bikewê bin garantîya destûrî, çareserîya demokratîke û huqûqîye ya meseleya kurdan bêro garantîkerdiş û seba Rayber Ocalanî şertê ke bieşko azad biciwîyo û bixebitîyo, bêrê afirnayîş.”
DBP’yî eşkerayîya xo wina qedênaye: “Azadîya ey tena azadîya yew kesî nîya; xalanê bingeyînan yê akerdişê rayîrê çareserîya demokratîke, awankerdişê aştîyêka daîmîye û cuya hempare ya şaran ra yew a. Coka azadîya Rayber Ocalanî seba aştîyêka demokratîke û daîmîye Tirkîya rê hewcedarîyêka tarîxîye ya!”
