Înîsîyatîfê Nûnî 9ê teşrîna verêne ser o eşkerayîyêk da û vat: “Na roje de ma vengê xo berz kenê: Tecrîdê sîyasî û fikrî rê ney, sîyasetê înkar û goşnêdayîşî rê ney; azadî, dîyalog, çareserîya sîyasî û aştîyêka biedalet û daîmîye rê eya.”
Înîsîyatîfê Nûnî derheqê Komployê Mîyanneteweyî yê 9ê teşrîna verêne de ke vera Rayber Abdullah Ocalanî ame kerdiş, eşkerayîyêka nuştekîye weşanaye.
Eşkerayîye de ame vatiş ke 9ê teşrîna verêne komployê vera Rayber Abdullah Ocalanî ano vîrî: “Înan waşt ke kurdan ke seba dewaya xo têkoşîn kenê, bêveng bikerê, fikrê înan qeyd bikerê û projeyê demokrasî, aştî û azadîye bigîrî mîyanê ablûka. Înan cehd kerd ke Ocalanî esîr bigîrê la nêeşkayî fikrê Rayberîye esîr bigîrê. Rayberîye xo resna heme şaran, cinîyan û ciwanan; înan projeyê ey de hêvîya azadî, edalet û seyyewbînîye dî.”
Eşkerayîye de ame dîyarkerdiş ke 9ê teşrîna verêne tena rojêka bi derd nîya; na roje de heqîqetê sîstemê mîyanneteweyî eşkera bî: “Sîstemê mîyanneteweyî hema zî goreyê feyde û peymanan nêzdîyê dewayanê şaran beno û heq û azadîyanê merdiman keno qurbanê hemsengîyanê sîyasîyan. Cinî vera tarîxî bêveng nêmanenê û qebul nêkenê ke hêzê serdestî îstîqbalê înan dîyar bikerê. Cinîyan vera şer, zulm û goşnêdayîşî xo ver da û eşkenê seba aştî, azadî û komelê demokratîkî pêşengîye bikerê.”
Goreyê eşkerayîye, tecrîdkerdişê Rayber Abdullah Ocalanî meseleya sîyasî çareser nêkeno; hepisxaneyî nêeşkenê fikirîyayîşî vindarnê û tecrîd nêeşkeno îradeyê şaran meydan ra wedarno. Eşkerayîye de wina ame vatiş: “Îstîqbalêko aram tena bi rayîrê dîyalog û çareserîya sîyasî eşkeno bêro awankerdiş; sîyasetê înkar, tecrîd û zulmî aramî nêvirazeno. Seba ke problemê Rojhelatê Mîyanênî çareser bibê û gonî nêrijîyo, ganî Prosesê Aştî û Komelê Demokratîkî dewam bikero û gamê cidîyî bêrê eştiş. Eke ney, şerê girdêrî do vejîyê û şarî, cinî û bindestî do reyna bibê qurban.”
Peynîya eşkerayîye de wina ame vatiş: “Ma do seba azadîye têkoşîn bikerê. Ganî heme cinî vera zulmî û seba îstîqbalêko birûmet, seyyewbînî û biedalet têkoşîn bikerê. Azadî tecrîd nêbena, fikr vîndî nêbeno û îradeyê şaran nêşikîyeno.”
