Komeleya Rojnamegeranê Cinîyan a Mezopotamya (MKG) xelatê Gurbetellî Ersoz emser reya dîyine Amed de bi merasîmêk dayî. Merasîmî de qalê têkoşînê raştîye yê rojnamegeranê cinîyan û tradîsyonê Çapemenîya Azade ame kerdene.
Merasîmê dayîşê Xelatanê Rojnamegerîya Cinîyan ê Gurbetellî Ersoz Merkezê Kongreyî yê ÇandAmedî de virazîya. Keyeyê şehîdanê Çapemenîya Azade, temsîlkarê partîyanê sîyasîyan û rêxistinanê komelê sivîlî û zaf kesî beşdarê merasîmî bîyî. Merasîm seba vîrameyîşê xebatkaranê şehîdan ê Çapemenîya Azade bi rêzegirewtişî dest pêkerd. Badê cû nawitgehêka fotografanê Gurbetellî Ersoz û rojnamegeranê şehîdan ameye akerdene.
Xelatî ameyî dayene
Merasîmî de xelata yewine ya warê xebera kurdkî, Perêze Remezan û xebera aye ya bi sernameyê “Çîroka Aske Kerîm: Birîndarek zindî ya karesata Enfalê û hovîtiya li Nugre Selman” girewte. Warê xebera tirkî de Elîfe Akgul bi xebera xo ya bi sernameyê “Merg bi neh taksîtan: Tirkîya de resayîşê çekanê bêruxsetan” bîye yewine. Xelata xase ya jurî ya na warî zî Gulîstane Gulmuş û Derya Renî girewte. Xebera înan ke JINNEWS de weşanîyaye, “Tehdîdê muhafizê Serekkomarî yo ke serbest verdîya, vera cinîyêk” bi.
Warê xebera vîdeoyine de xebata Sewsene Elî û Meryeme Reşo ya bi nameyê “Heviya Vegerê (Hêvîya Peyagêrayîşî)” bîye yewine. Warê fotografî de muhabira JINNEWSî Nudeme Mihemed bi eserê xo yê “Nêkişîyaye” xelata yewine, muhabira Ajansa Welatî Sema Gezicî zî bi xebata xo ya “Qêrîna Bêdeng” xelata xase ya jurî girewte. Xelata Rûmetî zî dîyarîyê ê kesan bîye ke qezaya Gimgim a Mûşî û qezaya Kanîreş a Çewlîgî de vera projeyanê JESî warê cuye pawenê. Wayîranê xelate vat ke do têkoşînê xo yê ekolojîye girs bikerê û bidomnê.
“Ma do wayîrîya têkoşînê aye bikerê”
Sereka MKGyî Roza Metina vat ke Gurbetellî Ersoz pê tedayan zî dest xebata xo ya rojnamegerîye ra nêverda. Roza Metina wina vat: “Ma do wayîrîya têkoşîn, bawerî û mîrasê Gurbetellî bikerê.” Roza Metina dîyar kerd ke Çapemenîya Azade bi astengkerdiş û qefelnayîşê medyaya dîjîtale bêveng nêbena. Mesajê keyeyê Gurbetellî Ersoz de zî ame vatene ke mîrasê aye bi neslê newe yê rojnamegeranê cinîyan ciwîyeno.
Embaza Gurbetellî Ersoz Gultane Kişanak zî serranê ke înan pîya rojnameyê Ozgur Gundemî de xebitîyayêne, ardî vîrî. Gultane Kişanak bale ante qerardarîya Gurbetellî Ersoz ser o ke a dima şîye raştîye ser o. Merasîm bi fotografêko pêroyî yê wayîranê xelatan û beşdaran qedîya.
