Îdareyê Têgêrayîşî eşkera kerd ke hêzê xo pêro mîyanê sînoranê Tirkîya ra antî û 4 tunel û mewzîyê Metîna xeripnayî. Îdareyê Têgêrayîşî vat: “Verê gameeştişê azadîya Rayber Apoyî û qanûnanê azadîye de tu asteng û sebeb nêmendo.”
Îdareyê Têgêrayîşî eşkerayîyêk daye. Eşkerayîye de ame vîrardene ke Rayber Apoyî 23ê teşrîna verêna 2024î de cewabê Devlet Bahçelîyî da û wina vat: “Hêzê mi est o ke rewşa pêkewtişî bianca zemînê sîyasî û huqûqî.” Goreyê eşkerayîye, Prosesê Haştîye û Komelê Demokratîkî bi nê cewabî dest pêkerd û ser ra di serrî vîyartî. Rayber Apoyî nê di serran de cehdêko gird kerd û proses ard heta ewro.
Îdareyê Têgêrayîşî ard vîrî ke Têgêrayîşî bi vengdayîşê Rayber Apoyî yê 27ê sibata 2025î bêpêkewtiş îlan kerd. 5-7ê gulane de Kongreya 12. yê PKK’yî de PKK fesh bî û têkoşînê çekdarî yê vera Tirkîya qedîya. 11ê temmuza 2025î de Hemsereka Konseyê Rayraberdişî yê KCK’yî Besê Hozat û 30 embazanê aye çekê xo veşnayî. 26ê teşrîna verêne 2025î de zî tayê gerîlayî sînoranê Tirkîya ra ameyî antene. Nê gerîlayan endamê Konseyê Rayraberdişî yê KCK’yî Sabrî Okî reyde biqerarîya xo ya têkoşînê sîyasî û demokratîkî eşkera kerde. Eşkerayîye de wina ame vatene: “Di serran ra nat Tirkîya de tu pêkewtişo çekdarî çin o; yew ciwanê tirk yan kurd zî ganê xo ra nêbîyo. No bi xo erjê prosesî mojneno.”
Goreyê eşkerayîye, meclîsî de derheqê çareserîya demokratîke ya meseleya kurdan de komîsyonêk ame awankerdene. Komîsyon zafê partîyanê sîyasîyan ra ame meydan û Rayber Apoyî reyde zî kom bî. Komîsyonî raporêk amade kerd. Raporî de kêmanî û xeletîyî bîyî zî, tede dîyar bî ke meseleya kurdan bi çekan çareser nêbena. Raporî de tayê gamî zî ameybî rêzkerdene ke îradeyo sîyasî bieşko înan bierzo. La îradeyê sîyasîyî ne nê gamî eştî, ne zî derheqê demokratîkbîyayîşî de tu hereket kerd.
Îdareyê Têgêrayîşî bale ante na ser o ke Rayber Apoyî qanûnê çarçewayî sey “qanûnê kokî” zaf muhîm dî û vatbî ke dima ganî qanûnê azadîye zî vejîyê. La qanûnê çarçewayî goreyê tarîfê Rayber Apoyî nêvejîya. Têgêrayîşî qanûn red nêkerd, la dîyar kerd ke qanûn zaf problemin o. Goreyê Îdareyê Têgêrayîşî, qanûnî Rayberîye û îdareyê Têgêrayîşî teber de verdayê; coka qanûn bi xo bêmana û zehmet o. Qanûnî ra dima zî îqtîdarê AKP’yî tu game nêeşte. Rayber Apo tena yew reye heyetê Îmrali-DEM’î reyde kom bî û tecrîdê ey dewam kerd.
Îdareyê Têgêrayîşî wina vat: “Hêzê ma yê mîyanê Tirkîya rîskê pêkewtişî nêvirazêne zî, ma çend rojan ra ver înan pêro antî. Amancê ma no bî ke îqtîdarê AKP’yî êdî tu behane nêvejo. Eynî rojan de ma 4 tunelê şerî û mewzîyê Metîna yê rojawanê Zapî zî xeripnayî. Bi kilmîye, ma hêzê xo yê çekdarî pêro antî; hem yê mîyanê sînoranê Tirkîya, hem zî yê ke nêzdîyê sînorî bîyî. Dewleta tirke êdî nêşena qet behsê tehdîdêkê çekdarî bikero.”
Îdareyê Têgêrayîşî dîyar kerd ke êdî tu asteng û sebeb nêmendo ke derheqê azadîya Rayber Apoyî û qanûnanê azadîye de gamî nêrê eştene. Eşkerayîye de wina ame vatene: “Eke dewleta tirke vana ‘ma wazenê ke problemêko 100 serreyîn bi demokratîkbîyayîşî çareser bikerê’, ganî seba averşîyayîşê prosesî bê ereymendişî gaman bierzo. Eke îqtîdarê AKP’yî prosesî derg bikero û Têgêrayîşê Azadîya Kurdîstanî qels bikero, no do tarîxê Tirkîya de xeletîya tewr girde bo. Ma venga şaranê Tirkîya, heme hêzanê demokrasî û welatperweranê Tirkîya danê ke seba Prosesê Haştîye û Komelê Demokratîkî berpirsîyarîye bigîrê.”
