Avûkat Mahmut Şakarî vat ke bi komployê mîyanneteweyî huqûqê mîyanneteweyî binpay bi û na bêhuqûqî Îmrali de dewam kena. Şakarî dîyar kerd ke seba heqê hêvîye do Komîteya Wezîran reyde pêvînayîşan bikerê.
Huqûqnas Mahmut Şakar avûkatanê verênan ra yew o ke Girawa Îmrali de Rayberê Şarê Kurdan Abdullah Ocalanî reyde pêvînayîş kerdbî. Hemserekê Komeleya Demokrasî û Huqûqê Mîyanneteweyî (MAF-DAD) Şakarî serrgêra 28. ya komployî ser o Ajansa Welat (AW) rê qisey kerd.
Ocalan 9ê teşrîna verêne ya 1998î de Sûrîye ra vejîya û şi Ewropa. Muracaetê ey ê penaberîye pêro red bîyî û 130 rojan ra pey, 15ê sibata 1999î de Kenya de teslîmê Tirkîya bi. Şakarî ard ziwan ke komplo tarîxê Kurdîstanî de prosesêko şikitişî bî û wina vat: “Girawa Îmrali seba birêz Ocalanî newe ra ame dîzaynkerdene û uca de rejîmêk ame awankerdene. Birêz Ocalanî ra ver Îmrali hepisxaneyêko nêmakerde bî; no hepisxane sere de bi amancê tecrîdkerdişî ame awankerdene. Coka pêvînayîşê ma tim ameyî astengkerdene.”
Şakarî îfade kerd ke averşîyayîşanê komployî ra dima nirxnayîşo verên ê birêz Ocalanî raşt vet: “Birêz Ocalanî rolê hêzanê hegemonan ser o vinderd. Ey vat ke înan seba newe ra dîzaynkerdişê Rojhelatê Mîyanênî dînamîkê kurdan sey asteng dî û waşt ke tasfîye bikerê. Ey hema o wext de behsê Şerê Dinya yê Hîrêyinî kerdbî û vatbî ke dore do bêro Sûrîye, dima zî Îran. Nê pêro yew bi yew bîyî. Goreyê birêz Ocalanî, înan bi no amancî waşt ke kurdan bêstatu û îmha rê akerde verdê.”
Goreyê Şakarî, amancê komplogeran ê tasfîyekerdişê Têgêrayîşê Azadîye nêame ca. Şakarî wina vat: “Înan nêeşkayî dînamîkê şoreşgerî yê kurdan tasfîye bikerê û waştişê kurdan ê azadî û heqan bêtesîr verdê. Têgêrayîşê Azadîya Kurdîstanî verî ra hîna xurt o û dinya de vila bîyo. La amancê komployî ke nika bi şerê Îranî dewam keno, hema temam nêbîyo. Hêzê komploger hema zî wazenê kurdan bêstatu verdê û tasfîye bikerê; labelê bi pêşengîya birêz Ocalanî hêzê xoverdayoxî yê şarê kurdan zî est ê.”
Şakarî îzah kerd ke komplo bi xo bêhuqûqî ya û na bêhuqûqî Îmrali de dewam kena: “Dewletanê Ewropa no sîstem plan kerd, coka vera îşkenceyê Tirkîya bêveng ê.” Şakarî vat ke Dadgehê Heqanê Merdiman ê Ewropa 2014 de qerar da ke cezaya muebedî ya girankerda ya birêz Ocalanî vera heqanê merdiman a. Şakarî dîyar kerd ke Komîteya Wezîran do 3ê kanûn de heqê hêvîye newe ra bikero rojeva xo: “Ma do heta a roje Strazburg de verê temsîlkaranê dewletanê endaman reyde pêvînayîşan bikerê. Komîte na mesele ser o bi cidî nêvindeno; seba ke gam bierzo, têkoşînêko xurt û xebatê dîplomasî lazim ê.”
