Rayberê Şarê Kurdan Abdullah Ocalanî vera Komployê Mîyanneteweyî yê 9ê teşrîna verêne, şertanê giranan ê Îmrali de felsefeya xoverdayîşî kerde qada cigêrayîşê heqîqetî. Ey rayîrê pêkerdişê demokratîkî û aştîye mojna.
Komployê Mîyanneteweyî yê 9ê teşrîna verêne bi îtîfaqê zaf welatan ame kerdene. Amancê komployî o bî ke şexsê Rayberê Şarê Kurdan Abdullah Ocalanî de îradeyê şarê kurdan esîr bigîrê. Labelê Ocalan 28 serran ra nat Girawa Îmrali de bê vindertiş xo ver dano û têkoşînê azadîye aver beno.
Tarîx de vera îşkence û şikitişê îradeyî, pawitişê rûmetî, serewedarîyayîş û sir nêdayîş bîyo kulturê xoverdayîşî. Xoverdayîşê Ocalanî zî mîrasê xoverdayîşanê girdan ê tarîxî ser o ronişto. Ocalan şexsê xo de têkoşînê azadîya şaran û îradeyê cinîyan temsîl keno. O dîyar keno ke sey pêşengan û zanayanê girdanê tarîxî, o zî bi eşqê heqîqet û zanistî xo ver dano. Pawitiş, meqale, name û pêvînayîşanê ey de xemê bingeyîn roşnkerdişê heqîqetî û mojnayîşê rayîrê çareserîye bîyo.
Destpêkerdişê komployî gama verêne ya Herbê Dinya yê Hîrêyinî bî. Îsraîl ra heta Rûsya, DYA ra heta Yunanîstan, Misir ra heta Îngilîstan û Afrîka zaf welatan nê komployî de ca girewt. Amanc o bî ke bi esîrgirewtişê Ocalanî, Têgêrayîşê Azadîya Kurdîstanî bêro hêrskerdene û şer gird bikero. Bi no qayde dewleta tirkan do naye bikerdêne bahaneyê qirkerdişan û Rojhelatê Mîyanênî pêro de şerêk bido dest pê bikerdêne. Sîstemê Îmrali taybetî ame awankerdene ke şexsê Ocalanî de şarê kurdan, cinîyanê azadîwazan û şaranê Rojhelatê Mîyanênî esîr bigîro.
Pawitişê Ocalanî yo verên ê dawaya Îmrali “Manîfestoyê Demokrasî û Aştîye” bî. Ey no pawitişî hezîrana 1999î de temam kerd. Wexto ke bi cezaya îdamî ameyêne muhakemekerdene û hucreya camî de ameyêne ardene salona dadgehî, ey vengdayîşê aştîye û awankerdişê Komara Demokratîke kerd. Komel û raya pêroyî nê pawitişî rê heyret de mendî. Planê hêzanê mîyanneteweyîyan ê seba hîrakerdişê herbê herêmkî zî xirab bîyî.
Ocalan notanê pêvînayîşanê xo de derheqê nê pawitişî de wina vano: “Daktîloyêk nêda mi. Mi pawitişê xo yo 90 rîpelî temam kerd. Goreyê qeydeya her herbêkî ke aştîya ey est a, amancê min o bingeyên pawitişê cigêrayîşê çareserîyêka maqûle bî. Mi vat ke ganî pêkerdişêko demokratîk bibo. Mi dîyar kerd ke çareserîya demê ma pêkerdişo demokratîk o û eke no fehm nêbo, problem çareser nêbeno. La înan fehm nêkerd; înan sey waştişê xo şîrove kerd.” Pawitişê ke Ocalanî Îmrali de nuştî, demî reyde hîna xorîn û hîra bîyî.
