Avûkat Muharrem Erbeyî serrgêra 28. ya Komployê Mîyanneteweyî ser o vat ke bêencammendişê komployî kurdan rê serkewtişêko gird o. Ey dîyar kerd ke Rojhelatê Mîyanênî de bê şarê kurdan nêbeno ke game bêro eştene.
Komployê Mîyanneteweyî 9ê teşrîna verêne ya 1998î de vera Rayberê Şarê Kurdan Abdullah Ocalanî ame destpêkerdene. Ocalan 15ê sibate ya 1999î de Kenya ra bi hemkarîya dewletanê mîyanneteweyîyan ame remnayene û ame ardene Tirkîya. A roje ra nat Îmrali de binê şertanê tecrîdî de yeno tepiştene. Avûkat Muharrem Erbeyî serrgêra komployî ser o ajansê ma rê qisey kerd.
Erbeyî bale ante averşîyayîşanê Rojhelatê Mîyanênî ser o. Ey vat ke şarê kurdan şaranê bêdewletan mîyan de komelo tewr gird o: “Naye ra pey Rojhelatê Mîyanênî de bê şarê kurdan nêbeno ke yew proje bêro awankerdene yan zî gamêka newîye bêro eştene. Kurdî 40 serran ra nat hêzê xo mojnenê û seba nasname, heq û azadîya xo rayîrşîyayîşêko derg ramenê.”
Goreyê Erbeyî, amancê komplogeran o bî ke rolê kurdan herême de zeîf bikerê û şarê kurdan bêserek û bêîrade verdê. Erbeyî ard ziwan ke Rojhelatê Mîyanênî de şarî goreyê tepşê serekê xo qerarî genê. Ey wina vat: “Dewletanê mîyanneteweyîyan dî ke şarê kurdan Rayberê xo rê erjêko gird dano. Coka înan no komplo plan kerd la cehdê înan bêencam mend. Ez bawer kena ke şarê kurdan nêzdî de do bireso statu û nasnameyê xo.”
Erbeyî da zanayene ke na cografya de tena kurdî ney, armenî, suryanî, keldanî, êzîdî û elewî zî est ê û nê şarî pêro wazenê ke azad bibê. Ey vat ke dewletê mîyanneteweyî wazenê Rojhelatê Mîyanênî parçe bikerê û serdestîya xo dewam bikerê: “La Birêz Ocalan nê tepşan qebul nêkeno. Ey yewîyêka sîyasî û azade pêşnîyaz kerda.”
Erbeyî peynî de bale ante deklarasyonê “Seba Komara Demokratîke û Aştîye 1001 Îmzayî” ser o ke îmzaya ey zî tede est a. Ey îzah kerd ke waştişo bingeyin ê deklarasyonî no bî: Rayberê Şarê Kurdan rê firsendê pêvînayîşî bêrê afirnayene û rayîrê azadîya ey bêro akerdene. Erbeyî wina vat: “Seba munaqeşe statu, mekanêko munasib, sekreterya û estbîyayîşê roşnvîran lazim ê. Na rewşe tena Rayberê Şarê Kurdan rê ney heme şaranê Rojhelatê Mîyanênî pêro rê zî firsendêko gird o.”
