Heyetê Rayraberdişê Merkezî yê DEM Partî qetilkerdişê şervanê Tugaya Hesekê Sîpan Hiznî û mergê hemwelatijanê zîndanê Kobanî şermezar kerd û wina vat: “Merheleyêk hende nazike ya prosesî de, her hedîse eşkena bibo zemînê provokasyonan. Mesulîyetê hempar ê her kesî no yo ke verê virazîyayîşê zemînêko wînasî bigîrê.”
Heyetê Rayraberdişê Merkezî yê DEM Partî têkîldarê qetilkerdişê şervanê Tugaya Hesekê Sîpan Hiznî (Samî Şêxmûs Heso) û çalakîya şarî yê Kobanî de eşkerayîyêk nuştekî daye. Heyetê Rayraberdişê Merkezî yê DEM Partî eşkerayîye de qetilkerdişê Sîpan Hiznî û mergê hemwelatijanê zîndanê Kobanî de şermezar kerdî û wina vat: “Ma seba nê vîndîbîyayîşanê biêşan zaf xemgîn ê. Ma keyeyanê kesanê ke cuya xo vîndî kerda û şarê Rojava rê serweşîye wazenê û birîndaran rê zî şîfa wazenê. Sîpan Hiznî merheleyêka hesase ya prosesê entegrasyonî yê Sûrîye de ame qetilkerdene. No qetilkerdiş û tewrê hêrişê serê zîndanî, provokasyonêko eşkera yo.
Qetilkerdişê Sîpan Hiznî û hêrişê serê Zîndanê Kobanî ganî bi detayan bêrê cigêrayene. Ganî bilez sebebê mergan bêro eşkerakerdene, bê cîyakerdişê tu meqam û rutbeyî ganî berpirsîyarî bêrê tesbîtkerdene. Ma bawer kenê ke ancîyayîşê hêzanê asayîşî yê ke Heleb ra ver bi Kobanî ameyê ca kerdene, do vernîya zêdebîyayîşê alozî bigîro. Ganî rejîmê Şamî xo mûdaxeleyanê ke rewşe zêdeyêr aloz kenê ra dûrî bigîro. Ganî reaksîyono demokratîkî ê şarê Rojava bi hêrişan cewab nêgîro; ganî yew nêzdîbîyayîş bêro qebulkerdene ke îhtîlafê komelî kêm bikero, ne ke zêde bikero. Merheleyêka hende nazike ya prosesî de, her hedîse eşkena bibo zemînê provokasyonan. Mesulîyetê hempar ê her kesî no yo ke verê virazîyayîşê zemînêkê wînasî bigîro.”
