Kiştişê şervanê Tugaya Hesekê Sîpan Hiznî (Samî Şeyhmus Heso), ke hetê komanê çete ra ame remnayene, seranserê Rojavayê Kurdîstanî de bî sebebê serewedaritişî. Çalakîye Hesekê, Qamişlo, Dêrik, Amûde, Girkê Legê, Tirbespiyê, Çilaxa û Dirbesiyê de dest pêkerdibî, şewa vîyarte Kobanî de vurîya pêkewtişan. Netîceyê pêkewtişan û şewata ke Hepîsxaneyê Kobanî de vejîyayo de, ame dîyarkerdene ke 9 kesî cuya xo ra bîyî û 17 kesî zî bîyî birîndar. Hewildayîşê kewtena şaristanî yê hêzanê rejîmî, raştê mudaxeleya Hêzanê Asayîşê Kobanî û şarî ameyî. Rixmê xoancîyayîşê hêzê Şamî zî, alozîyî şaristanî de dewam kena û rewşa pêroyî yê herême de hetê emnîyetî ra tehlukeyêko gird xo dano mojnayene.
Semedê polîtîkayanê rejîmê Şamî û hewldayîşê Tirkîya ra, prosesê entegrasyonî yê Rojavayê Kurdîstanî de bi alozî û tehlukeyan rê rî bi rî yo. Averşîyayîşê ke rojanê peyênan de Rojavayê Kurdîstanî de qewimîyenê, asta tehlukeyê polîtîkayanê Şam û Tirkîya yê vera Rojavayê Kurdîstanî de ame astêka newe. Kiştişê şervanê Tugaya Hesekê Sîpan Hiznî (Sami Şeyhmus Heso), ke hetê komanê çete ra ame remnayene, pêroyî Rojavayê Kurdîstanî de bî sebebê serewedaritişêko gird. Mîyanê hîrê rojanê peyênan de, çalakîyê ke Hesekê, Qamişlo, Dêrik, Amûde, Girkê Legê, Tirbespiyê, Çilaxa û Dirbesiyê de dest pêkerdibî, şewa vîyarte Kobanî de vurîya pêkewtişan.
Şar, Şam û Tirkîya sucdar keno
Prosesê alozîye bi remnayîş û kiştişê Sîpan Hiznî ra, game bi game xorîn bî û heme şaristananê kurdan girewt mîyanê xo. 9ê êlule de Hesekê, Dirbesî û Amûde de bi hezaran kesî vejîyayî kuçeyan û seba girewtena kiştoxan vengdayîş kerdî. 10ê êlule de pêlê çalakîyan hîrayêr bîya. Qamişlo, Dêrik, Girkê Legê, Tirbespî û Çilaxa de Meclîsê Însîyatîfa Şarî û welatijî weriştê lingan ser û eşkerayîyê huşkî dayî. Eşkerayîyan de polîtîkayê rejîma Şamî û kayê dewleta Tirkîya ameyê dîyarkerdene. Welatijî kiştena Hiznî sey hadîseyêk ferdî nê la sey polîtîkayanê vera Rojavayê Kurdîstanî û şarê kurdî pênas kerdî.
Kobanî cewab da kayan
Şaristananê bînan ê Rojavayê Kurdîstanî reyde, Kobanî de zî şar kewt meydan. Şar Qada Cinîya Azad de kom bî û reaksîyonê xo mojna. Rixmê hewldayîşê Hêzanê Asayîşê Kobanî zî, endamanê asayîşa pêroyî yê Şamî kewtî mîyanê provokasyonan û waşt bi gazê îsotê mudaxeleyê şarî bikerê. Reaksîyondayîşa girseyî ser o pêkewtiş dest pêkerd û seranserê şaristanî de vila bî.
Rejîmî waşt ke hêzê xo mîyanê Kobanî de ca bikero
Zêdebîyayîşê hedîseyan ser o, rejîmê Şamî waşt ke bi maneya alozîyan, hêzê ke Heleb ra ameyî erşawitene Kobanî de ca bikero. Sewbîna eynî wextî de şaristanî de qedexeyê vejîyayîşê teberî zî îlan kerd. Waşt ke kesê ke hadîseyan de hetê asayîşî ra ameyê destbendkerdene, sewqî Helebî bikero. La no hewlê Şamî, raştê reaksîyonêko hêzdar ê şarî ame. Mabenê asayîşa pêroyî yê ke Heleb ra ameyê û Asayîşa Kobanî û hêzê ke Şamî erşawitibî de zî alozîyê vejîyayê.
Şewatî de 9 kesî cuya xo ra bîyî
Eynî wextî de Hepîsxaneyê Kobanî de vera hewldayîşê sewqê destbendkerdeyan sey protesto şewat ame vetene. Netîceyê şewatî de, goreyê agahîyan heta nika tewr tay 9 kesî cuya xo ra bîyî, 17 kesî zî birîndar bîyî. Kesê birîndar ameyê berdene nêweşxaneyanê Kobanî û dest bi tedawîya înan ame kerdene. Ame zanayene ke rewşa tayê kesanê ke tesîrî dûyî de mendê, giran a û tedawîya înan dewam kena.
‘Hedîseyê bê destûrê Şam û Tirkîya nêvirazênê’
Çimeyê sîyasî yê Rojava dîyar kenê ke vilabîyayîşê nê hedîseyan ê pêro şaristananê kurdan de netîceyê planêk xorîn û zafhetî yo. Heto yewine, hucreyê nimiteyê yê Şamî ser o ke bi hetkarîya Tirkîya, wazenê kîn û duştbîyayîşî mabenê şarê kurdan û ereban de xorîn bikerê û no çî seba pelçiqnayena Rojavayê Kurdîstanî bixebitnê. Goreyê çimeyan Şam û Tirkîya hewl danê ke bi nê maneyan hêzê Şamî zêdeyêr şaristananê Rojavayê Kurdîstanî de bi ca bikerê. Hewldayîşê ardena hêzanê neweyî seba Kobanî zî sey provaya na rewşe yeno vînayene û erjnayene.
Kobanî de rewşa îstîsnayîye dewam kena
Kobanî de, rewşe her çiqas goreyê şewa bîne tayê normal bîya zî, alozîye şaristanî de dewam kena. Ame zanayene ke heme kesê ke vizêrî ameyî destbendkerdene, saetanê şewa de serbest ameyê veradayene. Hêzê ke Heleb ra ameyê erşawitene şaristanî ra ancîyayî û endamê xo yê ke netîceya hedîseyan de birîndar bîyî, ameyê neqlkerdena Helebî. Karmendê girêdayî Şamî yê ke şaristanî de bîyî zî agêrayî cayê xo.
Tedawîya birîndaran dewam kena
Tedawîya kesanê ke vizêrî hem hadîseyan de hem zî şewatî de birîndar bîyî, dewam kena. Ame zanayene ke zafêrî yê birîndaran badê tedawîya verêne nêweşxaneyan ameyê vetene. Tedawîya kesanê ke rewşa înan hina cidî ya zî dewam kena.
Do seba kesanê ke cuya xo ra bîyî merasîm bêro viraştene
Yeno pawitene ke do seba kesanê ke netîceyê hedîseyan de cuya xo ra bîyî merasîmêk bêro viraştene. Seba merasîmê cenazeyan, şaristana de hedrekarî dewam kenê û yeno pawitene ke bi des hezaran kesan cangorî bêrê definkerdene.
Şar paweyê cezakerdena kiştoxan o
Şaristananê sey Qamişlo, Hesekê, Dêrik û Dirbesî de şar paweyê helwestêk zelal û cezakerdena kiştoxan a bê wext, la Kobanî de qedexeya vetena teber û rewşa alozîye dewam kena. Rixmê zêdebîyayîşê hedîseyan zî, heta nika hetê Hukmatê Demkî yê Şamî ra eşkerayîyêk nêame dayene. No çî zî reaksîyonê şarî yê vera rejîmî zêdeyêr keno.
Seba girewtena kiştoxan operasyonê destbendkerdişî
Ame eşkerakerdene ke ewro saetanê sibayî de, seba girewtişê kiştoxanê Sîpan Hiznî û çeteyanê ke herême de nîjadperestîya vera Kurdan tuj kenê, operasyonê destbendkerdişî ameyê destpêkerdene. Ame îdiakerdene ke na çarçewa de, hêzê asayîşî sereştişê xeylî dewan kenê.
