Zafê şaristanê Vakurê Kurdîstanî û Tirkîya de şehîdê têgêrayîşê azadîye yê Kurdîstanî bi girseyî yenê vîrardene. Girseyê ke tewrê vîrardene benê, sozdarîya xo ya şehîdan reyde anê ziwan û hîsanê keyeyan pare kenê.
Amed
Bi rayberîya Komeleya Yewî, Kultur, Paştîdayîş û Hetkarîya bi Keyeyanê ke Dergûşa Şaristanîye de Merdimanê Xo Vînî Kerdê (MEBYA-DER) ya Amedî seba cangorîyanê Têgêrayîşê Azadîye yê Kurdî yê ke tarîxanê cîya-cîyayan de cuya xo vîndî kerda, salona Geterlerî ya qezaya Rezanî ya Amedî de programê vîrardene yeno rayraberdene. Programê vîrardene roja diyîne de dewam keno. Keyeyê cangorîyan, parlamenterê DEM Partî, endam û rayberê partîyanê sîyasî û temsîlkarê dezgehanê komelê sîvîlî tewrê programê vîrardene bîyî. Serê maseyan de resmê cangorîyan û vilikî ameyî ronayene. Salone de pankartê “Şehîdî Nêmirenê”, “Ma bi şima serberz ê cangorîyê Kurdîstanî” û posterê Rayberê Şarê Kurdî Abdullah Ocalanî ameyî dardekerdene. Roja diyîne ya vîrardene de şar bi zîyaretanê girseyîyan hîssanê keyeyan pare keno û keyeyan rê serweşîye wazeno. Girse bêmabên slogananê “Şehîdî Nêmirenê” erzena.
Sêrt
Endamê Têgêrayîşê Azadîye yê ke têkoşînê azadîya Kurdîstanî de tarîx û cayanê cîyayan de cuya xo vîndî kerda, roja diyîne de Salona Veyve yê Ûgûrî yê Sêrte de bi hawayêko girseyî yenê vîrardene. Keyeyê şehîdan, endam û rayberê partîyanê sîyasî û dezgehanê komelê sîvîlî yê şaristanî û zaf hemwelatîyî tewrê programê vîrardene benê. Salona ke tede vîrardene esta, posterê girdî yê Rayberê Şarê Kurdî Abdullah Ocalanî û resmê şehîdan ameyî daleqnaye. Heto bîn ra resmê şehîdan bi renganê kesk, sûr û zerdî ameyî xemilnayene. Pankartê bi nuşteyanê “Cewherê cuya ma şehîdê ma yê”, “Ma şehîdanê xo nêdanê axê, danê zerrîya xo”, “Têkoşînê înan rayîrê ma roşn keno”, “Ma deyndarê şehîdanê xo yê, şehîdê ma rûmetê ma yê”, “Şehîdê ma ameyoxê ma yê”, “Xeyalê cangorîyan bi rêxistinkerdiş û wayîrvejîyayîşî mimkun o” û “Şehîdî roşnîya rayîrê ma yê” ameyî daleqnayene. Girseyê ke vîrardene zîyaret kenê, wexto ke kewenê salone bêmabên sloganê “Şehîdî nêmirenê” û “Bijî Serok Apo” berz kenê. Vîrardene bi zîyaretanê girseyîyan dewam kena.
Riha
Bi rayberîya Komeleya Yewî, Kultur, Paştîdayîş û Hetkarîya bi Keyeyanê ke Dergûşa Şaristanîye de Merdimê Xo Vînî Kerdo (MEBYA-DER) seba kesê ke têkoşînê azadîye de cuya xo vîndî kerda, Banê Şînî yê Rezanî yê Qezaya Eyubîye de, taxa Sarayaltiyê ya qezaya Pirsûsê ya Riha de, Banê Taziye yê Mustafa Dagi de û Banê Şînî yê Silêman Nebatî yê Wêranşarî de programê vîrardişî ame viraştene. Program bi deqayêk rêzgirewtiş û wendişê marşê “Çerxa Şoreşê” dest pêkerd. Salona ke merasîm tede yeno kerdene, bi resmanê kesê ke tarîxanê cîyayan de cuya xo vîndî kerda, posterê girdî yê Rayberê Şarê Kurdî Abdullah Ocalanî û pankartanê “Şehîdî roşnîya rayîrê ma yê” ameye xemilnayene. Vîrardene de girse bêmabên sloganê “Rayîrê şehîdî rayîrê ma yo, Apo serekê ma yo”, “Biciwîyo Serok Apo” û “Şehîdî nêmirenê” berz kerdî. ‘Ma do şehîdanê xo vîr ra nêkerê’ programê vîrardene de pîyê Kendal Bagerî (Yusuf Tutal) Emîn Tutalî kesê ke têkoşînê azadîye de cuya xo vîndî kerda vîr ardî û wina vat: “Ma do qet şehîdanê xo vîr ra nêkerê. Rayberê ma Rayberîye ya. Ma şer nêwazenê, ma aştîye wazenê. Wa destê aştîye hewa de meverdê. Şehîdê ma do zerrîya ma de biciwîyê.” ‘Ma soz danê şehîdan û Rayberîya xo’ Dima waya Devrîm Denîze (Deniz Karakeçili) Çîgdeme Karakeçilî qisey kerd û nê çîyî ardî ziwan: “Şehîdê ma mîrasê ma yê. Ma soz danê şehîdan û Rayberîya xo ke ma do têkoşînê xo berz bikerê. Serê şarê Kurdî û Kurdîstanî weş bo. Bi felsefe û paradîgmaya Rayberîya xo ma tîya de yê. Heta ke Rayberîya ma azad bibo do têkoşînê ma dewam bikero. Şehîdî nêmirenê.”
Programê vîrardişî bi zîyaretanê girseyîyan dewam keno.
Şirnex
Merkezê Şirnexî û qezayanê Silopî, Elkê, Hezex û Qilebanî de bi rayberîya Komeleya Yewîye Kultur Paştîdayîş û Hetkariya bi Keyeyanê ke Dergûşa Şaristanîye de Merdimê Xo Vîndî Kerdê (MEBYA-DER) ya Şirnexî seba şehîdanê azadîye yê ke wext û cayanê ciyayan de cuya xo vîndî kerda, şîn ameye ronayene. Bi hezaran hemwelatî serdayîşê şînan kenê. Merkezê Şirnexî de yadkerdişê cangorîyanê azadîye Banê Şînî yê Mehmet Emîn Acarî yê ke taxa Yeşîlyûrtî de yo de yeno kerdene. Fotografê Rêberê Şarê Kurdî Abdullah Ocalanî û pankartê ‘Şehîdê ma rûmetê ma yê’ ameyî daleqnayene. Yadkerdişê seba cangorîyê azadîye bi rêzgirewtişê seba şehîdanê azadîye dest pêkerd. Bi seyan hemwelatîyê ke zîyaretê yadkerdişî kenê bêmabên slogana ‘Şehîdî nêmirenê’ berz kenê.
Qileban
Seba canfedayanê azadîye Bonê Şînî yê ke taxa Şantîye ya dewa Roboskî de yo de şîn ameye ronayene. Fotografê Rêberê Şarê Kurdî Abdullah Ocalanî û pankartê ‘Şehîdî rûmetê ma yê’ û ‘Şehîdî roşnîya rayîrê ma yê’ ameyî daleqnayene. Yadkerdiş bi rêzgirewtişê seba şehîdan dest pêkerd û bi seyan hemwelatîyî cayê yadkerdişî zîyaret kenê.
Silopî
Yadkerdişê seba şehîdanê azadîye Camîya Walî Kamîl Acûnî ya ke taxa Dîcle de bi wendişê Çerxa Şoreşî dest pêkerd. Cayê yadkerdişî de fotografê Rayberê Şarê Kurdî Abdullah Ocalanî, pankartê ‘Şehîdî roşnîya rayîrê ma yê’ û ‘Şehîdî rûmetê ma yê’ ameyî daleqnayene. Yadkerdiş de sloganê ‘Bijî Serok Apo’ û ‘Şehîdî nêmirenê’ yenê berzkerdene.
Hezex
Banê Şînî yê Camîya Konûtan yê ke taxa Atanketî de yo de yadkerdişê seba şehîdanê azadîye bi rêzgirewtişî dest pêkerd. Fotografê canfedayanê azadîye yê ke ameyî eşkerakerdene cayê yadkerdişî de bi vîlan û renganê kesk, sûr û zerdî ameyî xemilnayene. Heman wext de fotografê Rêberê Şarê Kurdî Abdullah Ocalanî û pankartê ‘Şehîdî roşnaya rayîrê ma yê’ û ‘Şehîdî rûmetê ma yê’ ameyî daleqnayene. Bi seyan hemwelatîyê ke ameyî yadkerdiş sloganê ‘Şehîdî nêmirenê’ berz kerdî. Yadkerdiş de Parlamentera DEM Partî ya Şirnexî Newroz Uysal Aslane vat ke ganî ê wayîrê mîrasê têkoşînê înan bivejîyê û wina qisey kerd: “Eke ewro şarê Kurdî çar hetaê Kurdîstanî de eşkeno waştişê heqanê xo bikero no bi saya şehîdan beno. Wa sereyê pêro şarê Kurdî weş bo. Ma do şînê xo bivurnê têkoşînê seba azadîye.”
Elkê
Dewa Germavî de seba Endama YJA-Starî Sozdar Abî (Jînda Feraşîn) şîn ameye ronayene. Yadkerdişo ke verê keyeyê malbate de yeno kerdene hetê zaf hemwelatîyan ra yeno zîyaretkerdene. Hemwelatîyê ke tewrê yadkerdişî bîyî sloganê ‘Şehîdî nêmirenê’ berz kerdê.
Stenbol
Bi hezaran kesî tewrê bernameyanê yadkerdişî bîyî. Pêro pîya bi keyeyanê şehîdan, Sekreterîya Îmralî ra Çetîn Arkaş, Dayîkê Aştîye, aktîvîstê TJAye, endam û îdarekerê partîyanê sîyasîyan, temsîlkarê dezgehanê komelî û bi hezaran hemwelatîyî tewrê bernameyê yadkerdişî yê ke DEM Partîya Esenlerî de virazîyeno bîyî. Salona yadkerdişî de serê masayan de fotografê şehîdan, Rayberê Şarê Kurdî Abdullah Ocalanî û qerenfîlî ameyî ronayene û pankartê “Ma şehîdanê rûmetî yad kenê”, “Şehîdê ma rûmetê ma yê”, “Têkoşînê înan rayîrê ma roşn keno” û “Şehîdî Nêmirenê” ameyî daleqnayene. Programo ke seba şehîdan virazîya bi deqeyêk rêzgirewtişî dest pêkerd. Dima rêzgirewtişî keyeyanê şehîdan qisey kerd.
‘Wa sereyê şarê Kurdî weş bo’
Keyeyanê şehîdan dîyar kerd ke şehîdî şehîdê pêro Kurdan ê û vat: “Wa sereyê şarê Kurdî weş bo, sereyê Rêber Apoyî weş bo. Ma bi şehîdanê xo serberz ê. Şehîdî nêmirenê. Bi saya şehîdan û Rayberîye yew proses ameyo destpêkerdene. Ganî ma wayîrê prosesî bivejîyê û dormeyê Serekîye de bibê yew.”
‘Şehîdan vat; ma do azad biciwîyê’
Dima Mûrat Arslan o ke badê 31 serran hepis ra vejîyabi dîyar kerd ke şehîdan kirasê eşqî xo ra kerdê û vat: “Serekî vatbî ‘heqîqet eşq o, eşq zî cuya azad a.’ Şehîdê ma zî heqîqetî temsîl kenê. Ewro Serekî persa ez senî biciwîya û meciwîya persena. Şehîdan zî cewabê nê persan da û vat; ma do azad biciwîyê.”
Badê qiseykerdişan sînevîzyono ke behsê têkoşînê cangorîyan kerdêne ame temaşekerdene û program bi wendişê mewlûdî dewam kerd.
Wan
Vîrardişê ke bi rayberiya Komeleya Yewîye, Kultur, Paştdayîş û Hetkariya bi Keyeyên ke Dergûşa Şarestanîye de Merdimê Xo Vînî Kerdê (MEYAB-DER) ya Wanî seba şehîdanê Têgêrayîşê Azadîya Kurdîstanî yê ke wext û tarîxanê ciyayan de cuya xo vîndî kerda qezayanê Rêya Armûşî, Qelqelî, Erdîş û xeylê dewanê Ebexî de yena viraştene, roja xo ya 2. de dewam kena. Bi des hezaran hemwelatî serdayîşê vîrardişî kenê û paştîdayîşê xo seba keyeyan nîşan danê. Rêya Armûşî Vîrardişa Salona Dawete ya Rûda ya Taxa Karşiyaka ke roja xo ya diyîne de ya, bi tewrbîyayîşê hezaran hemwelatiyan dewam kena. Serê sibayî ra nata hemwelatî bi girseyî tewrê vîrardişî benê û sersaxîye danê keyeyanê şehîdan. Hemwelatî seba şehîdan duayan kenê û sozê berzkerdişê têkoşîna înan danê. Dayîkê Aştîye yê Wanî zî bi slogananê “Şehîd namirin” û “Bijî Serok Apo” tewrê vîrardişî bîyî. Keyeyî û hemwelatî zî tewrê dayîkan eşê dayîkan bîyî. Siba bi tewrbîyayîşê qezayanê bînan zî programêko pêroyî yê vîrardişî bêro kerdene.
Erdîş
Vîrardişê Erdîşî, Salona Dawete ya Kavalya ya Taxa Çelebîbagî de roja xo ya diyîne de bi tewrbîyayîşê hezaran kesan dewam keno. Vîrardiş de wext bi wext sloganê “Şehîd namirin” yena berzkerdene û salon de pankartê “Şehîdê ma rûmetê ma yê” ameya daleqnayene. Roja diyîne de ciwanê Erdîşî bi pankart û fotografanê şehîdan tewrê vîrardişê şehîdan bîyî û sloganê “Şehîd namirin” û “Bijî Serok Apo” berz kerdî. Siba seba şehîdan eynî ca de programêko pêroyî yê vîrardişî yeno viraştene.
Qelqelî
Taxa Cûmhûrîyetî ya qezaya Qelqelî de zî seba şehîdanê Têgêrayîşê Azadîya Kurdîstanî yê ke wext û tarîxanê ciyayan de cuya xo vîndî kerda programê vîrardişî yeno viraştene. Dayîkê Aştîye, parlamenterê DEM Partî, temsîlkarê Platformê Dezgehanê Demokratîkan û bi hezaran hemwelatî tewrê ci bîyî. Salona ke vîrardiş tede ame viraştene bi fotografanê Rayberê Şarê Kurdî Abdullah Ocalan, fotografanê şehîdan û bi pankartê “Şehîd Namirin” ameye xemmilnayene. programê vîrardişî bi deqeyêk rêzgirewtiş ya seba vîrardişê şehîdan dest pê kerd. Wextê rêzgirewtişî de sloganê “Şehîd namirin” ameye berzkerdene û dima sînevîzyon ame temaşekerdene. Vîrardişê ewroyî qedîyê û ê do siba tewrê vîrardişa pêroyî ya qezaya Rêya Armûşî bibê.
Ebex
Qezaya Ebexî de zî keyeyan dewanê Nezrave, Tikme, Kel û Selikî de şîn ame ronayene. Şînê şehîdan bi zîyaretan roja xo ya diyîne de dewam keno û dima ê zî do 12ê Êlule de tewrê vîrardişa pêroyî ya qezaya Erdîşî ya Wanî bibê.
Dîlok
Bi rayberiya Komeleya Yewîye, Kultur, Paştdayîş û Hetkariya bi Keyeyên ke Dergûşa Şarestanîye de Merdimê Xo Vînî Kerdê (MEBYA-DER) qezaya Şahînbeyî ya Dîlokî de, tesîsa Firatî ya ke Taxa Firatî de ya, vîrardişo ke amebî viraştene roja xo ya diyîne de bi zîyaretan dewam keno. Zaf cayanê şaristanî ra hemwelatîyî, temsîlkarê dezgehanê komelê sivîl yê demokratîkî û keyeyî beşdarê vîrardişî bîyî. Salona ke vîrardiş tede yena viraştene de, fotografê Rayberê Şarê Kurdî Abdullah Ocalan û kesê ke tarîxanê ciyayan de cuya xo vîndî kerda ameyî daliqnayene. Reyna salone de pankartê “Şehîd namirin” û “Şehîdê ma rûmetê ma yê” ameyê daleqnayene. programê vîrardişî bi zîyaretanê girseyîyan dewam keno.
