Herêma Cizîrî de wendekaran qerarê Wezaretê Perwerdeyî yê Sûrîye ke bi kurdkî hewte de tena 3 dersî bêrê dayene, protesto kerd û perwerdeyê bi ziwanê dayike waşt.
Sûrîye de serra perwerdeyî ya 2026/2027î vizêrî dest pêkerd. Wendekarê herêma Cizîrî 2 rojî yo qerarê Wezaretê Perwerdeyî ke perwerdeyê kurdkî bi 3 dersanê hewteyî sînordar keno, protesto kenê.
Protestoyanê mektebanê Qamişloyî de ame waştene ke kurdkî erebkî reyde mekteban de sey ziwano fermî bêro dayene; wendekaran pankartê “Wê zimanê kurdî her zindî bimîne” û “Em tenê mafê xwe dixwazin” berz kerdî.
Til Temir de Mektebê Idnan El Malikî de wendekaran ard ziwan ke ziwan parçeyêko muhîm ê nasname û kulturî yo û ganî dersî bi materyalanê kurdkî bêrê dayene; waştişê înan zêdekerdişê hûmara dersanê kurdkî ney, naskerdişê heqê perwerdeyê bi ziwanê dayik o.
Dewa Xirbê Cihûyan a herêma Alîyan a Çilaxa de zî wendekaran salona mektebî de protesto viraşt û perwerdeyê kurdkî waşt.
