Îzmîr – Mehmet Saît Yildirim o 74 serreyî yo ke serra 1995î ra heta ewro zîndan de yo û cezaya ke dîya ci zî qedênaya la seba ke poşmanîyê qebûl nêkeno, nêno veradayîş. Mehmet Saît Yildirimî çend hewteyî nayera ver krîzê zerrî (qelbî) derbas kerd û tewlê nêweşîyanê xo yê giranan reyna birîya zîndan. Temsîlkara ÎHDî ya Îzmîrî Vetha Aydîne dîyar kerd ke qerardayişê heyetê Îdare û Çimverîyan legal nîyê û da zanayiş ke seba berdayişê zîndanîyanê nêweşan hewceyê qanûnanê neweyan çin a.
Mehmet Saît Yildirim o ke serra 1995î ra heta ewro zîndan de yo û 74 serreyî yo, nika Zîndanê Kiriklarî yê Tîpê Fî yê Îzmîrî de yenê vindertiş. Bi serranê dergano ke o vera nêweşîyanê zerrî, genetîk û kronîk, fitiqê vileyî, tansîyono berz, KOAH, nêweşîyê pişike û xusîyayişê damaran anceno û xover dano. Cezaya ey di 27ê Sibate de qedîyaya la maneyê ferzkerdişê poşmanîye ya Heyetê Îdare û Çimverîyî ya Zindanî ke qebûl nêkeno, nêno veradayene û raya hîrêyîne ya ke veradayîşê ey yeno taloqkerdiş.
Heyetê Îdare û Çimverîye 25ê Tebaxe de raya 3yîne poşmanîyê Mehmet Saît Yildirimî rê ferz kerde û ayera zî bira taloqkerdişê cezayî da. Mehmet Saît Yildirimî krîzê zerrî derbas kerd û 26ê Tebaxe de Neweşxaneyê Bajarî yê Îzmîrî de ame anjîyokerdiş û 2 stentî eştî zerrîya ey. Baroya Îzmîrî di binê kontrolê hekîman de şî zîyaretê Mehmet Saît Yildirimî. Baroyî zîyaret ra hema dima eşkera kerd ke Mehmet Saît Yildirim serê nivîna xo de ameyo kelemçekerdiş. Mehmet Saît Yildirim dima anjîyo û tedevî ra 28ê Tebaxe de reyna birîya zîndan.
Temsîlkara Herêma Îzmîrî ya Komeleya Heqê Mordeman (ÎHD) Vetha Aydîne derheqê zîndanîyo nêweş Mehmet Saît Yildirimî de qisey kerd.
‘Bir a heyetanê Îdare û Çimverîye qanûnî nîyê’
Vetha Aydîne da zanayene ke înan di 1ê Êlule de zîndan de pêvînayişêk Saît Yildirimî de kerda û nêweşîyê ey hema zî giran ê. Vetha Aydîne dîyar kerd ke seba veradayişê Mehmet Saît Yildirimî muracaatê inan devam kenê û wina vat: “Heyeta Îdare û Çimverîye goreyê keyfê xo hareket kena û çi ke qerarê înan objektîf nîyê û goreyê qanûnan nîyê. Ganî no heyet roja verêne ra biamêne vedaritene. Çike bi serrano ke destûrê hesabnêdayene dîyo nê heyetan ke goreyê sereyê xo hareket bikerê.”
‘Seba veradayîşê zîndanîyanê nêweşan hewceyê qanûnanê neweyan çîn o’
Vetha Aydîne destnîşan kerd ke Heyetê Îdare û Çimverîye Mehmet Saît Yildirimî seba ke poşmanîye nîşan nêdano ay ra veranêdano. Labelê ne hiqûqê Tirkîya de ne zî hiqûqê mîyanneteweyan de çîyêko nîyanên est o. “Heyet zîndanîyan zê ‘terorîst’ û ‘sûcdar’ vineno. Nê prosesê Aştî û Komela Demokratîke de zî nê heyetî poşmanîye ferz kenê. Eke nê girewteyê azadîye kerdenanê xo ra poşman bîbîyêne handayê serrî zîndan de nêmendêne. Seba veradayena zîndanîyanê nêweşan ne hewceyê qanûnê çarçewayî ne zî bi qanûnêko newe est o. Tena qanûnê ke est ê înan bîyarê ca bes o. La reyna zî raya veradayena girewteyanê neweşan nêna akerdene.”
‘Dewlete seba aştîye wezîfeyê xo nêkena’
Peynîya qiseykerdişê xo de Vetha Aydîne dîyar kerd ke ê vindernayişê şerî pozîtîf vinenê, tenê bi vindernayişê şerî heme problemî nêbenê çareser û vat: “Gerek di serî de girewteyê nêweşî biamêne veradayîş û seba ke nê kesî tewrê sîyaseta demokratîke bibê, rayê înan bêro akerdiş. Ganî heqê Kurdan ê bingehînî di qanûnê bingeyînî de cayê xo bigêrê. Se serrano ke qanûnê tirkîye înkarkerdena kurdan ser avan bîyê. No derheq de baro gird kuno serê milê dewlete, ganî dewlete gaman bierzo. La belê dewlete wezîfeya xo nêkena.”
