Komîsyonê Karûbaranê Multecîyan ê Talîbanî eşkera kerd ke saetanê peyênan de hezar û 477 Afganijî, Îran û Pakîstan ra ameyê vetene. Kesê ke ameyê vetene, bi şert û mercanê cuyayîşî yê zehmet û bêbîyayîşê xizmetanê bingeyîn ê welatî rê rî bi rî yê.
Komîsyonê Karûbaranê Multecîyan ê Talîbanî eşkera kerd ke çend saetanê vîyarteyan de bi pêroyî hezar û 477 multecîyê Afganijî, Îran û Pakîstan ra ameyê vatene û bi rayîrê beranê sînorî yê bejayî ra kewtê welat.
Afganistanijî Îran û Pakîstan ra yenê vetene
Eşkerayîyêka ke ameya dayene de, komîsyonî dîyar kerd ke kesê ke ameyê vetene, vizêrî, resayê Afganîstan û îfade kerd ke goreyê agahîyanê komîsyonî yê fermî, eynî roje de zêdeyîrê hezar û 200 multecî her di welatan ra agêrayê.
Tewr zêde Pakîstan ra yenê vetene
Hûmara Afganijanê ke Pakîstan ra yenê vetene zêde benê, çunke rayedaran tedbîrê vetişê Afganijanê bêbelgeyan zêde kerdê. Netîceyî de, hewteyanê peyênan de nisbetê tewr berz ê vetişî hetê Pakîstan ra yenê caardene.
Cinî û gede grûbê tewr bêpawite yê
Goreyê raporanê rêxistinanê herême û mîyanneteweyîye, kesê ke badê vetişî, agêrenê Afganîstan, bi şert û mercanê cuyayîşî yê zehmetan reyde rî bi rî menenê; taybetî bêbîyayîşê sitargehan, fersendê karî yê sînorkerde û xizmetê bingeyîn ê xirab ê sey tendirustî û perwerdeyî. Eynî wextî de cinî û gedeyê grûbê tewr mexdûr û bêpawite yê.
