Kongra Starî waşt ke Îran de cezaya îdamî bêro vindarnayene û teda û zordarîya tepişteyanê sîyasîyan ser o biqedîyo.
Kongra Starî derheqê caardişê cezaya îdamî yê Îranî de eşkerayîye daye. Eşkerayîye wina ya:
“Îran de sîyasetê îdamî her ke şino giranêr beno û dewam keno. Rojanê peyênan de ame dîyarkerdene ke zîndananê cîya-cîyayan ê welatî de xeylê tepişteyî ameyî îdamkerdene. Hengawî resna ke mabênê 24-26ê tebaxe de zîndananê Xorramabad, Sarî, Raşt, Yazd û Îsfahanî de hewt tepişteyî, Arezou Rostad, Mostafa Vosoughi, Masoud Nemati, Esmaeil Ajami, Hedayat Jamalzadeh, Emad Sheikhi û Amir Danaei, ameyî îdamkerdene.
Nê îdaman de îdamê Arezou Rostada ya 23 serrî bitaybetî zerrîya ma veşneno. Vajîyeno ke Rostad 19 serrîya xo de bi zorî ameybî zewicnayene û dima bi îdîaya kiştişê mêrdeyê xo bi cezaya qisasî ameybî mehkumkerdene. Arezou ke 24ê tebaxe de Zîndanê Merkezî yê Îsfahanî de ameye îdamkerdene, goreyê Hengawî hetê selahîyetdaranê Îranî ra şarî rê nêame eşkerakerdene.
Ma nameyê Arezou Rostadî ser o keye û merdimanê heme cinîyanê ke ameyî îdamkerdene û heme tepişteyan rê serweşîye wazenê. Ma dejê înan pare kenê û piştîdayîşê xo resnenê cinî, ciwan û heme şaranê Îranî ke seba azadîye xover danê.
Rejîmê Îranî herinda ke cewabê hêrs û waştişê azadîye bido ke komel de gird beno, îdamî sey hacetê tersnayîş û bêvengkerdişî şuxulneno. Bitaybetî îdamkerdişê kesanê ke bi protestoyanê çeleyê 2026î ra girêdaye yê, mojneno ke no sîyaset seba tepiştişê muxalefetê komelkî û sîyasî zî yeno şuxulnayene. Îdamê Majid Adinehî yê 23ê tebaxe nimûneyanê peyênan ra yew o; Rêxistina Heqanê Merdiman a Îranî resna ke Adineh bi protestoyanê çeleyî ra girêdaye ame îdamkerdene.
Îdam rejîmî xurt nêmojneno; eksê ney, qutbîyayîşê mabênê şar û îqtîdarî hîna girdêr keno. Her ke zordayîş zêde beno, herinda tersî de hêrs û herinda hêrsî de xoverdayîş cayê xo gêno.
Tarîxê Îranî yo nizdî zî nimûneyêka muhîme ya na raştî ya. Serranê peyênan ê rejîmê Pehlewî de zêdebîyayîşê zordayîşê sîyasî û şîdetê dewlete faktoranê ke qutbîyayîşê mabênê komel û îqtîdarî xorînêr kerd, tira yew bî. Ewro zî rejîmê Îranî bi eynî xeletîye bawer keno ke eşkeno îradeyê şarî bi zordayîş û îdamî hewano. La waştişê azadîye yê şaran bi daranê îdamî nêyeno çinkerdene.
Bêvengîya mîyanneteweyî ya vera îdamî zî nêyena qebulkerdene. Na bêvengî rejîmî rê wêrekîye dana ke îdamanê zêdeyêran bikero. Ganî rêxistinê heqanê merdiman, hêzê demokratîkî û şarê mîyanneteweyî vera nê îdaman de vindertişêko bihêzêr û encamdayox bigîrê.
La bi heme nê zordayîşan reyde zî xoverdayîşê şaranê Îranî nêvindert. Cinî, ciwanî, karkerî, wendekarî û şarê cîya-cîyayî yê Îranî waştişanê xo yê azadî û dadmendîye ra fek nêverdanê.
Ma sey Kongra Starî reyna eşkera kenê:
Ganî îdam bê ereykerdişî bêro vindarnayene. Ganî teda û zordarîya vera tepişteyanê sîyasîyan bêro qedênayene. Ganî seba îradeyê azadîye yê cinî û şaran rêz bêro girewtene. Ganî heqê şaranê Îranî yê cuyêka demokratîke û azade bêro naskerdene.
Ma nameyê Arezou Rostadî ser o heme cinîyanê ke ameyî îdamkerdene û heme kesanê ke cuya xo ra bîyî, bi rêz û hurmet yad kenê; keyeyê înan û heme şaranê Îranî rê serweşîye wazenê.”
