Cinîyê Sewregijê ke wisar ra bîyo Sewrege ra malê xo girewto ameyê koyanê Dêrsimî, derheqê cuya xo de, weşî û zehmetanê ke ancenê ser ma rê qisey kerd: “Nê koyî seba heywananê ma rindê la seba cuya ma û domananê ma binê zehmetîyan ancenîme.”
Halime û Halîse Karamanli qezaya Riha, Sêwregi ra yê û bi serran o ke malê xo gênê yênê koyanê Erzingan, Çewlîgî, emserr newe malê xo ardo koyanê Dêrsimî. Hetanê payîzo peyên malê xo nê koyanê Şoraqî yê ke girêdayeyê qezaya Pulemurîye, uca de kenê weye. Halime û Halîse ajansê ma rê qisey kerd.
Cuya ma nîya bi koçerîye derbaz bena
Halime Karamanli Sewrege ra heta koyê Dêrsimî berdişê malî û zehmetîyanê ke ancenê ser qisey kena û wina vana: Ma heta Sewrege ra yenê nê koyan rayîra zaf zehmetîyan ancenê. Cuya ma nîya bi koçerîye derbaz bena. Ma yenê nê koyan de nanîme ro, domanê ma zî tey ma yenê seba domanan binê zehmetî est a. Eke bî payîz ma keyeyê xo erebayan ra bar kenê reyna şonê dewa xo.
Tew rehetîya ma çin a. Zaf rayan est o ke nê konê ke ma tede manenê nêtawrenîme ke tede rakûme. Şewî est ê ma heta siba tede nuşenê ro. Çike wexto ke va yeno ma tersenê ke nê demîrê çadiran biginê sereyê domanan ra. Ma zaf zehmetîyan ancenê.
‘Şaristanî pak nîyê, nê cayî pakê û rindekê’
Halise Karamanliye zî seba rewşa xo ya koçerîye wina vana: “Koçerîye goreyê cuya dewan binê zehmeta la hetê xo yê weşî zî goreyê cuya şaristanan est ê. Hewayê xo rind o, şaristanî pak nîyê, nê cayî pakê û rindekê. Nê cayan de kesanê xo û kesanê cîya cîyayan nas kena.
Heto bîn ra ma yenê nê cayan, domanê xo zî tey xo anîme. Ma bi kamyonan yenê û gedeyî serê kamyonan de xeylî zehmetîyan ancenê. Eke rayîr ra ma rastê persêka nêrinde nêbime û biresim nê koyan seba malê ma rind o. Çike çereyê nê koyan zaf rind o. Karê ma yê îtayî zehmeto la gorê mi handê zî zaf giran nîyo. Makîneya cilan yê şutene çin a. Va û varan û şilîya nê cayan zaf a. Ma naye ra ver şîyêne Koyanê Erzinganî ey cayî binêna germin û goreyê îtîyayî binêna rehet bî. Domanê ma rojanê va û varanî de tersenê. Ez cî wazena mîyanê rehetîye de bimanî, domanê mi nê zehmetîyan nêancê la ma ancax nîya îdareyê xo vênenê.
