Karkerê madenî nêzdîyê 17 rojî yo seba heqdestê xo verê Wezaretê Enerjî û Çimeyanê Xozayî de çalakîye de yê. Avûkatê Sendîqa Mursel Underî dîyar kerd ke pêvînayîşê ke holdîngî reyde virazîyayî pozîtîf derbaz bîyî û ê nêzdîyê neticeyî yê.
Karkerê madenî yê ke girêdayeyê Sendîkaya Karanê Madenî ya Xoserî yê û Holdînga SSS a Yildizî ya Doruk Maden û Eti Gumuşê Xarpêtî de gureyenî, seba ke heqdestê xo bigîrê ameyî Anqara. Karkerê ke ameyî Anqara bi waştişê pêvînayîşî Wezaretê Enerjî û Çimeyanê Xozayî de virazê, nêzdîyê 17 rojî yo verê wezaretî de çalakîye de yê. Karkerî paweyê ke wezaretî reyde pêvînayîş bikerê û meseleya nêdayîşê heqdestê xo hel bikerê.Karkerî tewlê keyeyanê xo bi otobusan ameyî verê wezaretî. Tîya de avûkatê sendîqa Mursel Underî serê rewşa pêvînayîşan û rewşa çalakîye de eşkerayî da. Karker û keyeyê înan zî eşkerayî de amade bî.
‘Ma do siba neticeyî eşkera bikerê’
Mursel Underî dîyar kerd ke înan vizêr qerar girewtbi ke heta verê Serekkomarîye rayîrşîyayîş bikerê û wina vat: “Vizêrî heta nêmeyê şewe heyetê ma temsîkarê holdîngî reyde pêvînayîş kerd. No pêvînayîş pozîtîf derbaz bî. Coka zî ma ewro rewşa çalakîye vurnenê. Heyetê ke avûkatanê sendîqa ra yeno pê, pêvînayîşê rayedaranê holdîngî reyde do ewro zî dewam bikerê. Karker û keyeyê înan zî seba serekê sendîqa Gokay Çakir û pisporê rêxistinî Başaran Aksu yê ke vizêr ameybî destbendkerdene, verê Mehkemaya Anqara de yê. Ma nêzdî ra rewşa înan teqîb kenê. Ma zaf nêzdîyê neticeyî yê. Seba pêameyîşî holdîngî reyde pêvînayîşî yenê kerdene. Ma do siba neticeyê tewr peyênî eşkera bikerê.”
Eşkerayî ra dima karkerû keyeyê înan seba teqîpkerdişê rewşa destbndkerdeyan şîyê verê Mehkemaya Anqara.
