GÎB-DER’î qezaya Peyasî ya Amedî de bi sloganê “Ma bi ciwanî dest pêkerd, ma do bi ciwanî ser bikewi” turnuvaya futbolî viraşt. Turnuvaya ke 20ê temmuze de dest pêkerdibi, ewro bi kaykerdişê maçê fînalî qedîya.
Komela Seba Ameyoxî Ma Tîya de yê (GÎB-DER) verê awanîya komeleya xo ya qezaya Peyasî ya Amedî de bi sloganê “Ma bi ciwanî dest pêkerd, ma do bi ciwanî ser bikewi” 20ê temmuze de turnuvaya futbolî organize kerd. Amancê na turnuva, kulturê taxe ya kehan reyna ganî bikerê, gede û ciwanî cixara û madeyê kungkerdişî ra dûrî bikewê. Turnuva 3 kategorîyanê cîyayan de seba serreyanê 8, 10, 11, 13, 14, 17î ame viraştene. 15 grûbî û 75 gedeyî tewrê turnuva bîyî. Xeylî welatij û gedeyê seba temaşekerdişî maçî ameyê eynî ca. ewro bi kaykerdişê maçê fînalî qedîya. Gedeyan bi coşêko gird fînalê maçî de kaykerd.
Endamê GÎB-DER’î dîyar kerd ke xebatê înan ê seba ciwanan do dewam bikerê û do roja dişemî turnuvaya voleybolî dest pê bikero.
Fînalê turnuva bi coşêko gird qedîya.
