Xortê dewa Xatalaşîye şîyê welatanê xerîban û sukanê pîlan Velî Dûrmûş cayê ra nêşîyo, dewa xo de vindeto û qaytê naxire keno, vaşan çîneno. Nêwazeno dewa xo biterikno wina vano: “Wazon ke dewa xo de mêşerî, xortê dewa ma kes nêmend. Dewan de weşîye ramitene zê waxtê verênî nîya.”
Velî Dûrmûş, weşîya xo dewa Xatalaşîya ke girêdayeyê Çermê ya Çewlîgî de rameno. Emrê xo ra 32 serre yo û heta nika dewa xo ra nêşîyo teber. O, cinîya ey, Maye û pîyê ey pîya qaytê çewres sare naxire kenê. Eke bî hamnanan, Velî Dûrmûş seba zimistanî aşmê mergan çineno, vaşan dano arê û beno keno mereke.
Velî Dûrmuşî weşîya xo ya dewe ser, kar û xebatê xo yê dewe ser ajansê ma rê qisey kerd.
‘Qezencê nê karî endî çîn o’
Velî Dûrmûşî, kar û xebatê xo ser wina vat: “Namê dewa ma Xataleşîye ya. Ma dewa xo de naxire weye kenîme. No waxt, waxtê çînitena mergan o. Vaş çînenîme, danîme arê, jû aşme nê karî kenîme û xelesnenîme. Emser wewre û şilîye zaf varê. Her ca pelaxa, vaşî zafê emser.
Dewa ma de cîranî nêmendê. Teyna dî hîrê çeyî estê ey zî kokimê. Xortê dewa ma şîye sukanê pîlan. Teynarîme, xanima mi, maye û pîyê mî, ma pîya gurînime. Çewres dewarê ma estê. Tayîne benîme ware. Hêşîrîya dewan zafa, zimistanê xo girano. Şîyayîş û amayîşê suke çetina, nêbena. Alifê malî nêno guretene, ma handayê gurînîme reyna zî destê ma de tawa nêmaneno.”
‘Xortê dewa ma pêro şî teber, çixa ke bese kon dewa xo de manon’
Velî Dûrmûş wazeno ke dewa xo terk mekero. Dewe de mendene û şîyayene ser zî wina vano: “Kes çinîyo ke bigurîyo. Ma heqê mişagan danîme la kes o ke bêro bixebetîyo çin o. Verênde cîranî jûmînî de şîyêne, karê xo pîya kerdêne. Nika zê verî paştî dayena jûmînî çîn a. Perûne bar kerdo şîye. Gegênan won ke bar bikerî şerî teber. Dewa ma de jû xort nêmendo. Nîya ke şêro dewan de mendene nêbena. Nêwazena şêrî teber, na dewa ma ya, mezelê ma estê, rêçê ma estê. Îtade bîme pîl.”
