Çimeyanê DEM Partî ra derheqê pêvînayîşê Heyetê Îmralîyî yê Hetkarê Serekê Pêroyî yê AKP’yî Efkan Ala û Serekê Grûba AKP’yî Abdullah Guler reyde dîyar kerd ke seba ke qanûn aşma temmuze de bêro vetene pêkerdişêk est o û ame vatene îdiayê sey qanûn do bimano aşma teşrîna verêne, zûr ê.
Prosesê Aştî û Komelê Demokratîkî vakurê Kurdîstan û Tirkîya de rojevo sereke yo û bi munaqeşeyan dewam keno. Qanûnê Çarçewa ke demêko derg o rojev de yo, hetê raya pêroyî ra yeno munaqeşekerdiş û meraqkerdiş. No verkarê qanûnê çarçewa merhaleyêka krîtîk de yo. Yeno pawitiş ke aşma temmuze de verkarê qanûnê çarçewa bêro rojevê Meclîsî. Na merheleya krîtîke de, Heyetê Îmralîyî yê DEM Partî ke parlamenter Pervîn Buldan û Mîthat Sancar ra yeno pê, vizêr Hetkarê Serekê Pêroyî yê AKP’yî Efkan Ala û Serekê Grûba AKP’yî Abdullah Guler reyde pêvînayîş kerd. Derheqê pêvînayîşî de hetê DEM Partî ra hetanî nika eşkerayîyêka fermî nêameya dayene.
DEM Partî: Verkarê qanûnê çarçewa do aşma temmuze de Meclîs de bo
Badê pêvînayîşî hetê rojname û dezgehanê çapemenî ra îdiayê sey, ‘Qanûnê çarçewa do aşma teşrina verêne de vejîyo’ ameyî vilakerdiş. Çimeyanê DEM Partî ra ke ma înan reyde qisey kerd, derheqê pêvînayîşî de vat ke seba ke qanûn aşma temmuze de bivejîyo mutabakatêk est o û dîyar kerd îdiayê sey, ‘Qanûn do aşma teşrîna verêne de bivejiyo’ zûr ê.
Hetê bînî ra zî hem DEM Partî û hem zî AKP û partîyê sîyasî serê verkarê qanûnê çarçewa de mabênê xo de munaqeşeyan domnenê. Verkarê qanûnê çarçewa do verê ke Meclîs bikewo tehtîl partîyanê sîyasî rê bêro erşawitiş û dima zî şêro Heyetê Pêroyî yê Meclîsî û uca de ser o bêro munaqeşakerdiş.
Dimayê nê pêvînayîşanê Heyetê Îmralîyî û AKP’yî, yeno paawitiş ke Heyetê Îmralîyî şêro girawa Îmralîyî û Rayberê Şarê Kurdî Abdullah Ocalanî reyde pêvînayîş bikero.
