Cagira Sereka Grûba DEM Partî Gulîstan Kiliç Koçyîgît ard ziwan ke heyetê DEM Partî ya Îmralîyî do miyanê hewteyî de serê pêşniyaza qanûnî de pêvînayîşanê xo dewam bikerê û va ke do pêvînayîş de pêşniyaza qanûnî pêşkêşê partîya înan bêro kerdene.
Cagirê Sereka Grûba DEM Partî Gulîstan Kiliç Koçyîgît, derheqê averşiyayîşanê peyênan de meclîs de eşkerayî daye. Gulîstan Kiliç Koçyîgît destpêkê qiseykerdişê xo de qetlîamê Zîlanî vîr ard, va ke qetlîamê Zîlanî vîrê Kurdan de dejêko pîl o û da zanayene ke seba ke dejê winasî reyna nêbê, ganî têrîameyîşêk bibo, dejanê verênan ra dersî bêrê girewtene. Gulîstan Kiliç Koçyîgît dîyar kerd ke wezîfeya meclîsî no yo ke goreyê hewceyanê şarî qanûnan virazo û wina qisey kerd: “Demêko derg o îqtîdar paketanê qanûnan ê sey qanûnê torbe aşma temmuze de ano rojevê meclîsî.
Sebebê ey zî no yo ke qanûnê ke şarî eleqedar kenê, wextê ke balê şarî meclîs de nîyo, anê rojev. Reyna hetê bînî ra no krîzê ekonomî her ke şino hîna xorîn beno. Gureyê îqtîdarî budçeyêka ke seba hewceyanê şarî bibo cewab û heqê kede bipawo virazo. Yewna babeta muhîme zî tedayê serê unîversîteyan ê. Ganî tedayê serê unîversîteyan bêrê wedaritene û akademî azad bê. Demokrasî bi azadîya akademîyan eşkena bêro garantîkerdene. Seba naye zî ganî efûya wendekaran zî pêro wendekaran bigîro mîyanê xo bêro caardene.”
Zîrweyê NATO’yî
Dewamê qiseykerdişê xo de Gulîstan Kiliç Koçyîgîte bale ante serê Zîrweyê NATO’yî û wina domna: “Seba Zîrweyê NATO’yî welat kerdbî sey zîndanêko akerde. Seba NATO’yî 4 mîlyar TL xerc kerdî. Rayîrî viraştî. O wext budçe de problem çin o. Ew bi çi ame xerc kerdene? Bi pereyanê ma. Feqîrîye zî bi bariyeranê NATO’yî nimitî. Labelê barîyerî nêşkenê rastîye binimnê. Ganî nê çimeyî seba şarî bêrê abirnayene. Ma seba ke nê halî bivurnê têkoşîn danê û têkoşînê ma do dewam bikero.”
‘Ganî qanûnê çarçewa bilez bêro rojev’
Gulîstan Kiliç Koçyîgît dîyar kerd ke serrgêra vêşnayîşê çekan seba welatî tarîxêko newe yo û wina dewam kerd: “Seba nê zî 11ê temmuze tena tarîxêk nîyo, eynî wextî de xurtkerdişê hêvîyê aştîye ya. Labelê goreyê naye ra yew serre de gamê hewceyî nêameyê eştene. Rapora komîsyonê meclîsî rayîrvistişêk bî. La hema zî ê pêşnîyazî bi ca nêameyê. Çi pawenê? Ganî nê pêşnîyazî bilez bêrê qanûnkerdene. Aktîvîstê nê prosesî ganî bêrê pawitene. Qanûn ganî nêro kategorîzekerdene û heme endamanê rêxistine mîyanê xo de bihewêno. Girewteyê sîyasî bêrê veradayene. Statuyê birêz Ocalanî bêro garantîkerdene û şertê xebatê ey bi qanûnan bêrê garantîkerdene. Ganî huqûqêko demokratîk bêro viraştene. Ziwan û nasnameyê Kurdan ganî bi qanûnan bêro garantîkerdene û no zî seba aştîyêka domdare hewceyîyêka bingeyîn a. No tena waştişê partîya ma û şarê Kurdî nîyo. Paweyê komelî yo.
‘Ganî verê ke meclîs mabên bido, qanûn bêro viraştene’
Cayo ke tede çekî ameyê vêşnayene, uca de ganî aştî û demokrasî bêrê garantîkerdene. Ma tîya ra veng danê pêro partîyanê sîyasîyan ke bêrê ma na berpirsîyarîye pîya bi ca bîyarê û verê ke meclîs mabên bido, ma pîya qanûnêke çarçewa virazê. Serrêk verê cû firsendêko pîl vejîya. O firsend hewna zî esto. Êdî peydeeştiş ney, game eştiş hewce yo. Bêrê ma aştîya nê welatî pîya awan bikerê. Ganî serekê meclîsî zî berpirsîyarîye bigîro xo ser û pêro partîyanê sîyasîyan reyde pêvînayîş bikero û mutabakatêk virazo.” Gulîstan Kiliç Koçyîgît serê persa rojnamegeran de dîyar kerd ke heyeta înan do mîyanê hewteyî de serê pêşnîyaz qanûnê çarçewaya de pêvînayîşanê xo dewam bikero û vat: “Pêvînayîş do derheqê pêşnîyazan de bêro kerdene û do pêşnîyazî pêşkêşê heyetê ma bikerê.”
