Komeleyê Şorişgêranê 78an seba şair Ahmet Tellî merasimê oxirkerdene viraşt û merasim de şîîrê Ahmet Tellîyî ameyî wendene û deyîrî ameyî vatene.
Federasyonê Şorişgeranê 78an, seba şair Ahmet Tellîyo ke 10ê temmuze de wefat kerd, Şubeyê Odaya Muhendîsanê Înşaatî (ÎMO) ya Anqara de merasimê oxirkerdene viraşt. Hemsereka Pêroyî ya DEM Partî Tulay Hatîmogullari zî tewrê merasimî bîye. Heskerdoxê Ahmet Tellî, nuştoxî, endam û temsîlkarê partîyanê sîyasîyan, sazgehê sivîlî, parlamenterê partîyanê sîyasîyan û zaf kesî tewrê programê bîyî. Salona ke tede merasim ame viraştene de fotografê Ahmet Tellî ekran de ameyê mojnayene.
Wexto ke cenazaya Ahmet Tellîyî arde salone, beşdarî weriştî payan ser û demêko derg çepikan pirodayê. Badê cû zî şîîrê Ahmet Tellî ameyî wendene.Dima ra zî seba deqîqeyêke rêzgirewtiş ame kerdene û girseyî rêzgirewtiş de marşê enternasyonalî wend. Badê ra deyîra Grûp Yorum ‘Siyrilip Gelen’ ke şîîra Ahmet Tellîyî ra amebî amadekerdene, ameye vatene.
‘Do her tim ma reyde biciwîyo’
Badê cû nuştox û embazê Ahmet Tellî Mahmut Temîzyurek qisey kerd û vat ke ê şairêko pîl oxir kenê û wina vat: “Ahmet Tellî şairêko pîl bi. Raya ke Nazim Hikmetî akerde, o zî wey ra şi û a raye pîl kerde. Têkoşînê xo yo şorişgerî û şairîya xo kerde yew. Merdimêko enternasyonal bî. Ahmet Tellî vatêne şîîre vera bêedaletîye de ya.”
Badê ra kênaya Ahmet Tellî Eylul Tellî qisey kerd û vat ke pîyê aye Ahmet Tellî her tim vera neweşîye de xover da û wina vat: “Ma nika seba xemgînîya ke ey dima xo verdaya ney, seba mîrasê ke ey ma rê verdayo silam bikerî tîya de yê. Pîyê mi tena yew şairêk nêbî, eynî wext de xem kerdêne hêvî. Şîîrî nêyenê bêvengkerdene. Mîraso tewr pîl o ke ey seba ma caverdayo; rûmet, wijdan û hêvî ya. Pîyê min do bi şîîr û ruhê xo yo têkoşer her tim ma reyde biciwîyo.”
Dimayê sînevîzyono ke bi vengê şîîranê Ahmet Tellî û fotografanê ey amebî amadekerdene û qalê cuye û têkoşînê ey kerdêne, ame temaşekerdene.
‘Vera zulmî de sere wedarna’
Badê temaşekerdişê sînevîzyonî Serekê Federasyonê Şorişgêranê 78an Huseyîn Esenturk qisey kerd û vat ke oxirkerdene Ahmet Tellî seba înan zaf giran o û nê çîyî ardî ziwan: “La çi heyf ke ma ey ra xatir wazenê. Ahmet Tellî wijdan û şîîra komelî yo. Sewbîna komel bi xo yo. Ahmet Tellî o çî banderê ma kerd; eke ma pîya têbikoşî ma do bihêz bibê û serbikewê. O rastê îşkenceyan ameyo û zindanan de rastê zulmî ameyo. Sewbîna vera zulmî de sere wedarna.”
Sekreterê Pêroyî yê Komeleyê Zanist, Huner û Edebîyatî Cengîz Kaplanî zî dîyar kerd ke Ahmet Tellî do bi têkoşîn û şîîranê xo her tim înan reyde bo û wina vat: “Ahmet Tellî do her tim zerrîya şaran de bo. Oxir bo embaz Ahmet, Oxir bo şair Ahmet Tellî.”
‘Heta ke Sosyalîzm bêro nê welatî têkoşînê ma do dewam bikero’
Hemsereka Pêroyî ya DEM Partî Tulay Hatîmogullari zî dîyar kerd ke ê seba oxirkerdene Ahmet Tellî ameyî têver û keye û embazanê ey rê serweşîye waşte. Tulay Hatîmogullari ya ke qalê naskerdişê xo û Ahmet Tellî kerd, nê çîyî ardî ziwan: “Çimanê ey de huyayîş estbî. Çimanê ey de bawerîya têkoşînêk estbî. Kekê Ahmet têkoşîn banderê ma kerd. Ma Ahmet Tellî ra xatir nêwazenê. Ma do ey ra vajî raya to akerde bo. Ahmet Tellî do bi kitabanê xo zerrîya ma de bicîwîyo. Seba nê zî ma ewro sey xatirwaştiş ney la sey oxirkerdene bêpeynî vînenê. Ewro ma to bi marşê enternasyonalî û beyreqa sure ya sosyalîzmî oxir kenê. Ma soz danê to ke heta ke sosyalîzm nêro nê welatî, têkoşînê ma do dewam bikero û ma do têkoşînê enternasyonalî hîna pîl û bihêz bikerî.”
Tornanê Ahmet Tellî zî qisey kerd û vat ke ê do wayîrê mîrasê Ahmet Tellî bivejîyê. Badê ra embazê Ahmet Tellî şair û nuştox Şukru Erbaş qisey kerd. Şukru Erbaşî zî qalê embazîya xo ya Ahmet Tellî kerd û wina vat: “Ma pîya şîyênê bajaran û şîîrî wendêne. Ez nika ey ra vana; silavanê ma Metîn Altinok û Ahmet Erhanî rê bikere. Sewbîna Nazim Hikmet û şairê Kurdî Cegerxwînî rê zî silaman bike.”
Hunermend Îlkay Akkaya zî merasîm de qisey kerd û qalê vîrrardişê xo û Ahmet Tellî kerd û wina vat: “Zaf rey çalakîyan de yan zî verê zindanan de ma ameyênê têhe. La ma xatir nêwazenê, çike çalakîyan de ma do her tim reyna bêrê têver. Mi qeranfîlê Dayîkanê Şemîye seba Ahmet Tellî ardî û ez do ey rê dîyarî bikerî.”
Şair Nevzat Çelîk û rojnameger Vecdî Erbayî zî merasîm de qisey kerd û qalê têkoşîn û vîrameyîşê Ahmet Tellî kerdî.
Şairê Kurdî Lal Laleşî zî bi şîîreka kurdkî Ahmet Tellî yad kerd û va ke Ahmet Tellî seba aştî û seypêyî têkoşîya yo. Badê cû endamê sazgehan, embaz û dostenê Ahmet Tellî qisey kerd û qala cuye û têkoşînê Ahmet Tellî kerdî.
Badê qiseykerdişan mesajê Dayîkanê Şemîye û mesajê nuştox û embazanê Ahmet Tellîyî ke seba merasîmî erşawitbî, ameyî wendene.
Badê merasîmî seba oxirkerdene cenazaya Ahmet Tellî ver bi Goristanê Karşiyaka kewt rayîr.
