Komîteyê Ciwanan û Sendîkaya Umut-Seni seba ke Zirweyê NATOyî protesto bikerê, Kuçeyê Îstîklalî û Kadikoy de rayîrşîyayîş viraşt. Dima rayraşîyayîşî zaf kesî ameyî destbendkerdene.
Zîrweyê NATOyî 7 û 8ê temmuze de Anqara de virazîyeno. Xeylê şaristananê Kurdîstan û Tirkîya de vera NATO’yî çalakîyî virazîyenê. Stenbol de Komîteyê Ciwanan û Sendîkaya Umut-Senî seba protestokerdişê Zîrweyê NATO’yî Kucukparmakkapi de ameyî pêser û hetanî Kuçeyê Îstîklalî rayîrşîyayîş viraşt. Rayraşîyayîş de sloganê “Kiştox NATO, hemkar AKP” û “Emperyalîst û hemkarî, Fîloya 6. xo vîra mekerê” ameyî berzkerdene. Girseyê rayraşîyayîşî ra Kuçeyê Îstîklalî de tewr kêmî 10 kesî ameyî destbendkerdene.
Eynî saetan de Kadikoy de zî ciwanan rayraşîyayîşêk viraşt û uca de zî zaf ciwanî ameyî destbendkerdene.
