*Hevserokê Komeleya Ziman a ARÎ-DERa yê Êlihê Rênas Yildiz anî ziman ku ew ê her tim li dijî kesên êrîşên zimanê Kurdî dikin derbikevin û wiha got: “Ew çi bikin bila bikin, ew ê Kurd zimanê xwe biparêzin û hîn bibin. Ev bûyera ku li dijî saziya me ya ziman pêk hatiye em bi tund şermezar dikin.”
*Endamê Lijneya Navendî ya Rêveberiyên Xwecîhî ya DEM Partiyê Mûstafa Avci anî ziman ku xurtkirina rêveberiyên xwecîhî dabeşkirina hêza dewletê ye û ev tişt anî ziman: “Li Fransayê ewilî hêz hêdî hêdî ji navendîbûnê derket. Ev yek bû gava yekem û mirov dikare ji bo Bakur vê modelê bikar bîne.”
*Gundê Nehrî ya navçeya Şemzînan a Colemêrgê ku di dîroka Kurdistanê de xwedî cîhekî girîng e, mazûwaniya gelek berhemên dîrokî jî dike. Qesra Qayme, Qesra Kelatê û Pira Bêgirdî ku ji aliyê kurê mezin ê Şêx Ûbeydûllahê Nehrî Mihemed Siddîq ve hatiye çêkirin, çend cihên dîrokî yên ji van berheman in.
*Siyasetzan Doç. Dr. Arzû Yilmaz derbarê polîtîkayên Amerîkayê yên li ser Rojhilata Navîn, têkiliyên bi Kurdan re û şerê Îranê re axivî û wiha got: “Niha li Rojhilata Navîn kaosek heye. Di vê tabloyê de berpirsiyar Amerîka ye lê ne aşkere ye ku dê Amerîka çi bike. Heta stratejiya Amerîkayê heye an tune ye ew jî nediyar e. Amerîka di çavê hevalbendên xwe de baweriya xwe winda dike. Heta nikare li ser hevalbendê xwe yê herî nêzîk Îsraîlê jî bandorê bike. Her wiha jixwe polîtîkaya Amerîkayê ya Kurdan tune ye.”
*Wê îro ji bo şehîdên Tevgera Azadiya Kurdistanê li Eywana Dawetê ya Dogu Plasê ya navenda Colemêrgê û Taxa Hesênka ya navçeya Çelê bîranîn bê lidarxistin. (09.00-18.00)
*Bi pêşengiya Platforma Saziyên Demokratîk û tevlibûna malbatan Şehîdên Tevgera Azadiya Kurdistanê dê li Enqereyê bên bibîranîn. (10.00)
