* Nivîskar Mûsa Şanak diyar kir ku bi êrişên karkerên Kurd, gotinên nijadperestî û xurandina birînên Elewiyan tê xwestin li dijî pêvajoyê enerjiyek negatîf derxin holê û wiha got: “Îxtîmalek heye ku di nava burokrasiyê, emniyetê û artêşê de jî hêzek ku dixwaze şer xurt bike heye. Dibe ku hin tiştan ji xwe re bikin hincet û gumanên di nava gelê Kurd de xurttir bikin. Dibe ku provakasyonên mezintir çêbikin. Divê şiyarbûnek hebe.”
* Parêzer Gulan Çagin Kalelî derbarê hedef girtina bîranînên cangoriyan, zimanê li dijî bîranînan tê bikaranîn de diyar kir ku di demeke ku behsa aştî û civaka demokratîk tê kirin de ne mecbûr in ku bibêjin “Miriyê te, miriyê min”, lê divê bikaribin bibêjin “Mafê te yê şîn danînê jî bi qasî yê min hêja ye” û wiha got: “Bi dîtina min civaka demokratîk a rastî tam jî li vir dest pê dike.”
* Emrûllah Zumrut ê ku bi salan e bi karê bazirganiyê û tekîstîla cilûbergan re mijûle, diyar kir ku wan di sala 2009an de markaya bi navê Heftreng a cilûbergên Kurdî ku bi rengên kesk û sor û zer pêk tên vekiriye û ji ber hincetên propagandayên rêxistinê û siyasî desthilatê ew îmalata wan a cilan dabû sekinandin. Zumrut got ku piştî ku îmalatê dabûn sekinandin, wan careke dinê bi heman nav û rengî markaya xwe vekir û dest bi dirûtina cilan kir.
* Li navçeya Sûra Amedê, bi hevkariya Komeleya Berî Her Tiştî Zarok û Zarok TVyê xebateke ji bo nivîsandinê ya zarokan tê kirin. Zarokên ku beşdarî kargehên çîroknivîsîn û dramayê dibin, amadekariya hejmara 2yemîn a kovara “Nivîskarên Biçûk” dikin. Kovara ku hemû nivîsên wê ji aliyê zarokan ve tên nivîsandin, wê di 12ê Îlonê de derkeve.
* Endama Komelaya Jinan a Starê Pinar Kûtevî derbarê mirina bigûman a Rojîn Kabaîşê de axivî û diyar kir ku Rojîn ne ya ewil, ne jî ya dawî ye û wiha got: “Em çend bêdeng bibin wê ewqas Rojîn bên kuştin, lewma divê jin di nava jiyanê de têkoşînê bikin.”
* KESK dê li oteleke Enqereyê komxebata 3yemîn a jinan ku dê 3 rojan bidome li dar bixe. (10:00)
* Komeleya Mafên Mirovan a Amedê dê derbarê kuştin û doza Mehmet Sîncar de li avahiya xwe daxiyaniya çapemeniyê li dar bixe. (14:00)
* Şaredariya Rezanê, GÎB-DER û Platforma Şiyar Be dê derbarê hişbir û fihûşê de li ber Salona Werzîşê a Şaredariya Rezanê daxuyanî bide çapemeniyê. (17:00)
* Rêxistinên DEM Partiyê û DBPê yên Êlihê dê Habîp Kiliç ê ku di 2yê Îlona 1993yan de û Parlamenterê DEPê yê Mêrdînê Mehmet Sîncar û rêveberê DEPê Metîn Ozdemîr ên di 4ê Îlona 1993yan de li Kuçeya Elmayê ya Êlihê hatibûn qetilkirin, li Kuçeya Elmayê bi bîr bînin. (17:00)
