Platforma Saziyên Demokratîk a Wanê bertek nîşanî binçavkirinan da û diyar kir ku binçavkirin û serdegirtinên ku bi hinceta bîranînan hatine kirin nayên qebûlkirin.
Platforma Saziyên Demokratîk a Wanê, ji bo protestokirina serdegirtina malan û binçavkirinên ku danê sibahê li bajarên Kurdistan û Tirkiyeyê hatin kirin, li Qada Bajêr a navçeya Rêya Armûşê daxuyaniyek dan. Li gel endamên platformê, nûnerên partiyên siyasî û saziyên civakî yên demokratîk ên li bajar û gelek welatî tev li daxuyaniyê bûn.
‘Aştiyeke birûmet berpirsiyariya hemû aliyan e’
Rêveberê Partiya DEMê ya Wanê Umit Gul ê ku metna daxuyaniyê xwend, diyar kir ku binçavkirin û serdegirtinên ku piştî Pêvajoya Aşitî û Civaka Demokratîk a Rêberê Gelê Kurd Abdullah Ocalan hatine kirin nayên qebûlkirin. Umît Gul bi domdarî wiha got: “Ev hemû gav ji bo ku êşên di rabirdûyê de hatine kişandin careke din neyên jiyîn û ji bo civakîbûn û aştiyeke birûmet hatin avêtin. Rawestandina windahiyên civakî, aborî, derûnî û siyasî ku ji ber israra di neçareseriya meseleya Kurd de û pêvajoya pevçûnê ya ku 50 salan zêdetir e dewam dike hatine jiyîn û avakirina aştiyeke birûmet berpirsiyariya hemû aliyan e.”
‘Di nêzikatiya pêvajoyê de herkes di heman helwestê de nîne’
Umît Gul diyar kir ku binçavkirinên bi hinceta bîranînan hatine kirin nayên qebûlkirin û wiha pê de çû: “Parvekirina êşan û avakirina taziyeyên gel li gorî çanda xwe ya li bajaran, tenê bi rêzgirtina her kesî ji bo vê yekê re ji bo siberojeke hevpar û azad dibe ku pêk bê. Divê her kes bizanibe ku bibîranîna gel a bo zarokên xwe, nayê wateya nedîtina êşa yên din; berovajî wê tê wateya ku êdî tu can nekeve axê. Binçavkirinên ku duh û îro li Amed û Wanê hatine jiyîn nîşan didin ku di nêzîkatiya pêvajoyê de her kes di heman helwestê de nîne. Li herêma me nêzîkatiya gelê me ya ji bo şînan zelal e. Di baweriya me de tê zanîn ku çawa nêzîkî şînan dibin.”
‘Di polîtîkayên dijhiqûqî de israr tê kirin’
Di berdewamiya axaftina xwe de Umît Gul anî ziman ku Kurd wê her dem xwedî li zarokên xwe yên ku di têkoşîna siyasî ya demokratîk de jiyana xwe ji dest dane û bedel dane derkeve, şînên layîqî wan çêbike û bîranînên wan bide jiyîn. Umît Gul destnîşan kir ku ew binçavkirinên bi hinceta ku tev li bîranînê bûne qebûl nakin û wiha axivî: “Daxwaza me ya bingehîn berçavgirtina hesasiyetên gelê me û vegera ji vê politîkaya çewt a di vê pêvajoyê de ye. Duh li Wanê hewldana revandina hevalên me yên ji meclisa ciwanan bi ti awayî nayê qebûlkirin. Û ev yek nîşan dide ku di polîtîkayên kevn û dijhiqûqtiyê de israr tê kirin. Kes û saziyên ku li ser navê raya giştî vê pêvajoyê birêve dibin, divê van provokasyonan pêşbînî bikin, hişyar bin û em dîsa diyar dikin; divê hesasiyetên gelê me berçav bigirin. Ev rewş nayê qebûlkirin.”
Hewl dane ciwanan birevînin
Parlementera DEM Partiyê ya Wanê Gulderen Varli jî di daxuyaniyê de axivî û destnîşan kir ku duh hewldana revandinê rû daye. Gulederen Varli da zanîn ku wan tespît kiriye ku plakaya wesayîta ku hewl daye ciwan birevîne sexte ye û got: “Me bi zanîna hesasiyetên xwe gav avêt vê pêvajoyê. Ev provokasyonek li hemberî vê pêvajoyê ye. Em bêtehemuliya li hemberî şînên xwe qebûl nakin. Aştî çi dibe bila bibe dê bê vê axê.”
