Platforma Saziyên Demokratîk a Amedê bertek nîşanî serdegirtin û binçavkirina da û got: “Em qebûl nakin ku şîn, taziye û bîranînên ku tundî tê de tunene bibin mijara lêpirsîn û operasyonên binçavkirin.”
Platforma Saziyên Demokratîk a Amedê têkildarî serdegirtin û binçavkirinan de daxuyaniyek nivîskî da. Platformê diyar kir ku di 3yê îlona 2026an de li Amed, Îzmîr û Manisayê 15 kes hatine binçavkirin û wiha hat gotin: “ Em qebûl nakin ku şîn, taziye û bîranînên ku tundî tê de tunene bibin mijara lêpirsîn û operasyonên binçavkirin. Peyva mirovan a ewilî ya li hemberî mirinê êş e. Parvekirina êşê, ji deriyê mala taziyê derbasbûna hundir, rûniştina li cem dayikek, bavek, xwişk-birayek bi êş, girtina destên wan, xwestina sersaxiyê yek ji tevgerên herî kevnar ên mirovahiyê ye. Li van axan taziye di heman demê de berpirsiyariyeke civakî, deynê exlaqî û kevneşopiyeke xurt e. Bi sedsalan e mirov di demên xwe yên herî giran de ji bo vê yekê deriyê hev du lê dixin. Tiştê dikeve ser milê dewletê, ew e ku ew şert û mercên ku mirov karibin şînê xwe bi serbestî bijîn misoger bike û nehêle ku tirs li ber deriyên taziyan be.”
‘Bila kes êşa dayikekê nexe ber êşa dayikeke din’
Di daxuyaniyê da hat destnîşankirin ku Tirkiye ji bo dawîanîna şerê çekdarî û çareseriya demokratîk a pirsgirêka kurd derbasî pêvajoyeke girîng a dîrokî dibe û wiha domand: “Di qonaxeke wisa de israra li ser rêbazên ewlehiyê û krîmînalîzekirina şîn, bîr û nirxên civaka kurd, mirovan diêşîne. Aştî bi jêbirina bîrê nayê avakirin. Nabe ku em ji mirovên ku zarokên xwe winda kirine îro ji bîr bikin, rakirina wêneyên wan, ji gorên wan dûr bisekinin, zêmar û şîna wan bidin terkkirin. Em ji zarokên xwe yên ku jiyana xwe ji dest dane û ji malbatên wan re rêzdariyê dixwazin. Bila kes êşa dayikekê nexe ber êşa dayikeke din.”
Di daxuyaniyê de bertek nîşanî binçavkirina hat dayîn û wiha pê de çû: “Em operasyonên binçavkirinê yên ku berbangê qebûl nakin. Welatiyên ku hincetên wekî birevin an jî delîlan veşêrin tune, li şûna ku welatiya vexwînin îfadeyê, bimser malên wan de girtin û binçavkirinê vediguherînin cezakirinê. Serdegirtinên malan di malbat û civakê de tirs û bêbaweriyê diafirîne. Di serdemeke ku aştî tê axaftin de mezinkirina baweriya civakî berpirsiyariya me hemûyan e.”
Di dawiya daxuyaniyê de daxwaza berdana binçavkiriyan hat kirin.binaç
