Şêwirmendê Serokkomariya Sûriyeyê Mazlûm Ebdî û fermandarê Tûgaya Kobanê Mehmûd Berxwedan bi gelê Kobanê re civiyan. Mazlûm Ebdî diyar kir ku ji bo ronîkirina bûyerê komîteyeke lêpirsînê ya taybet hatiye avakirin.
Bi armanca şîrovekirina geşedanên dawîn, Şêwirmendê Serokkomariya Sûriyeyê Mazlûm Ebdî û Fermandarê Tûgaya Kobanê Mehmûd Berxwedan îro li Kobanê civînek ji gel re li dar xist.
Piştî deqeya rêzgirtin, Mazlûm Ebdî behsa bûyera li zindana kir û bi bîr xist ku piştî şihadeta Sîpan Hiznî xwepêşandan hat lidarxistin û got: “Piştî xwepêşandanê hejmareke ciwan hatin girtin. Paşê ji ber gefên ku ew ê hemû girtî sewqî Helebê bên kirin, di girtîgehê de rageşî derket, di encamê de 10 girtî şehîd bûn û 17 jî birîndar bûn.”
Mazlûm Ebdî da zanîn ku ji bo ronîkirina bûyerê komîteyeke lêpirsînê ya taybet hatiye avakirin.
Ebdî qala peymana 29‘yê Çileyê û bicihkirina wê jî kir û destnîşan kir ku gelek ji wan mijarên sereke hatiye çareserkirin.
Şêwirmendê Serokkomariya Sûriyeyê Mazlûm Ebdî bal kişand ser mijara perwerdeya bi zimanê Kurdî jî û wiha dom da axaftina xwe: “Lê li ser dosyaya zimanê Kurdî nîqaş tê kirin û ji bo vê yekê jî wê çareserî bê dîtin. Pêwîst e zimanê me yê kurdî zimanê me yê xwandinê bibe zimanekî fermî. ”
Civîn ji ragihandinê re girtî dewam kir.
