AMED – Qezaya Peyasî de seba problemanê komelî Meclîsê Şarî awan beno. No meclîs hetê şarî ra ame awankerdene ke şar bi xo problemanê xo çareser bikero. No Meclîsê Çewresan de do problem, têmîyanî û munaqeşeyê ke mîyanê şarê ma de est ê, bêrê erjnayene û çareserkerdene.
Cayo ke meclîs tede yeno viraştene, ma aşmêk verê cû şî uca û fotografî girewtî. Keyeyêko zaf xirabin û rijîyaye bî. Şarî o keye newe ra viraşt û xemilna. Meclîsî de şarî ra 40 kesî do ca bigîrê û nameyê meclîsî zî do bibo Koyê 40an.
Amancê nê meclîsî no yo: seba ke demanê peyênan de Kurdîstan de dewayê gonî û mabênê şarî de pêrodayîşî zêde bîyî, no meclîs seba çareserkerdişê nê probleman ame awankerdene. Problemê kamî bibo, meclîs do çareser bikero.
Hema zî xebatê ucayî dewam kenê. Akerdişê ci do 21ê êlule de bêro viraştene.
“Çîyo ke no meclîs awan kerd, paradîgmaya Rayberî ya”
Hemwelatîyanê ke seba nê meclîsî kede daya, tira Firat Çetînî ajansê ma rê qisey kerd û vat: “Ma sey şarî ameyî têhet û qerarê nê meclîsî girewt. Nê meclîsî de do çewres kesî ca bigîrê. Manaya nê meclîsî seba ma muhîm a. Şima vanê çira? Çîyo ke no meclîs awan kerd, paradîgmaya Rayberî ya. Na paradîgma reyde cuya komkî yena awankerdene; nê bingeyî ser o ma keye û welatê xo awan kenê.
Seke aseno, meclîsê çewresan de do problem, têmîyanî û munaqeşeyê ke mîyanê şarê ma de est ê, bêrê erjnayene û çareserkerdene. Nê bingeyî ser o ganî sazgeh û dezgehî şarê ma û meclîsê ma reyde bêrê têhet û wayîrê ci bivejîyê. Ma no meclîs bitaybetî Peyas de awan kerd, sebebê ci no yo ke Rayberîye serranê 1973-1974î de planê xo Peyasî ser o kerdbî.”
Vengdayîşê wayîrvejîyayîşê meclîsî
Kedkaranê hemwelatîyan ra Orhan Kayayî zî qisey kerd û vat: “Ma yew meclîs awan kerd ke pêrodayîş û problemê mîyanê şarî bêrê çareserkerdene. Ma wazenê ke problemê mîyanê şarê ma biqedîyê. Seke şima zî zanê, Kurdîstan bîyo çar parçe û wina yeno îdarekerdene. Coka seba ke nê parçeyî bibê yew û şar aramî û wayûbirayîye reyde biciwîyo, ma rê eynî tewir meclîsê şarî lazim ê. Akerdişê meclîsê ma do 21ê êlule de bibo. Nika ra ma venga heme kesan danê ke wayîrê nê karî bivejîyê.”
