Hunermend Kamer Erdogan ebe kilama “Çemê Mengelî” bêvengîya xo ra vejîya û vengê xo medyaya dîjîtale û YouTube ser ra resna heskerdoxanê xo. Heskerdoxan zî eleqeyêko rind nîşan da û waşt ke dewamê ci bêro.
Kamer Erdogan şarê Gimgimî ra yo û bi serran o ke ziwanê dayîka xo ser o vindeno û kirmanckî ser o xebatan keno. Televîzyonanê Kurdan de pêşkêşkarîya bernameya dewan, sey “Tanya Adirî” û Jiyan Tv de hem merkezê xeberan de xebetîya û hem zî programo aktuel “Her Het Ra” peşkeş kerdêne.
Zarok Tv de bi desan deyîrê domanan amade kerdî. 2012 de ey rejîsorîya fîlmê kilmî yê “Sipî” kerd û no fîlmo kilm ebe ziwanê zazakî zaf cayan de layîqê xelatan ame dîyayene. Heto bîn ra zî goreyê aqil û famê xo nuşteyî ceribnayenê.
Zaf kilamê Kamer Erdoganî est ê ke nuşte, beste û muzîkê ci ey viraştê. Heta nika şiîrê ke ey nuştê û beste û muzîkê ci viraştê, hetê tayê hunermendanê zê Ayfer Dûzdaş, Sakîna teyna, Miraz ameyê wendene.
Kamer Erdogan, raya verên a ke raya pêroyî rê, ebe vengê xo yew kilama xo vila keno. Nameyê kilama ey “Çemê Mengelî” ya û eşqî ser o ya. Kilame nêzdîyê di hewteyan o ke YouTube de pare bîya û hetê şarê ma ra eleqeyêko rind nîşan dîya. Heskerdoxanê Erdoganî parekerdişanê youtubê û hesabanê bînan de waşt ke dewamê ci bêro.
