DEM Partî reaksîyon da munaqeşeyanê elewîtîye ke notanê tayê pêdîyayîşan ser o bîyî û bi îdîaya ke yê Abdullah Ocalanî yê û vat: “Ma qebul nêkenê ke hesasîyetê elewîyan bibê hacet.”
Eşkerayîya Komîsyonê DEM Partî yê Şar û Bawerîyan wina ya:
“Rojanê peyênan de notanê tayê pêdîyayîşan ser o ke bi îdîaya ke yê Birêz Abdullah Ocalanî yê ameyî servîskerdene, bi îfadeyanê ‘îtîfaqê Yavuz Sultan Selîm-Îdrîs-î Bîtlîsî’ munaqeşeyêka newîye ya elewîtîye yena rayraberdene. Seke verê cû Heyetê ma yê Îmralîyî û partîya ma ardbî ziwan, erjnayîşêko wina yê Birêz Ocalanî çin o.
Nêzdîbîyayîşê Birêz Ocalanî yê ‘elewîyî tam zerrîya nê prosesî de yê’, eşkera mojneno ke o elewîyan sey subjeyanê eslî û ronayoxanê haştî û komelê demokratîkî vîneno. Her tewir nêzdîbîyayîşê ke elewîyan teberê prosesî de nano ro, nê perspektîfî reyde pênêgênê.
Têkoşînê hemwelatîtîya seypêye, demokrasî û azadîye û vîrê tarîxî yê elewîyan hetê awankerdişê haştîya komelkî ya menda ra erjîyaye yê. Nêyeno qebulkerdene ke nê hesasîyetî bibê hacetê manîpulasyonê sîyasî û elewîyî vera prosesê haştîye de bêrê mojnayene.
Elewîtî wayîra bawerî û vîrêko komelkî yo pêt a ke cigêrayîşê heqîqetî, persayîş, aqil, edalet, rizayî û seypêyî esas gêna. Komelê elewîyan wayîrê îradeyî yê ke bierjno ka vatişê ke nameyê ci ser o yenê berhemdayene, heqîqet û raştîya tarîxî ya elewîtîye reyde pêgênê yan nê.
Ma sey Komîsyonê Şar û Bawerîyan ê DEM Partî qebul nêkenê ke hesasîyetê elewîyan bibê hacet. Prosesê Haştî û Komelê Demokratîkî cuya azade ya bawerîya elewîyan û caardişê azadîya îbadetê înan pawenê. Heqê hemwelatîtîya seypêye esasê demokratîkbîyayîşî yo ke nêyeno verdayene. Bi na mana ma reyna bale ancenê ser o ke elewîyî subjeyanê ronayoxan ê komelê demokratîkî û haştîya menda ra yew ê.”
