Gaziyên şer serdana Rêvebera Herêma Qamişlo Cîhan Seîd Hesam kirin. Gaziyan ji bo erka wergirtiye Cîhan Hesam pîroz kirin û di xebatên wê de serketinê xwestin.
Heyeteke ji rêveber û gaziyên şer ên Federasyona Gaziyên Bakur û Rojhilatê Sûriyeyê, Rêvebera Herêma Qamişlo Cîhan Seîd Hesam li cihê lê ziyaretkirin.
Cîhan Hesam jî gaziyan bi coş pêşwazî kir û diyar kir ku bi serdana gaziyan hestyar bûye û wiha got: “Hatina we ji bo min pir giranbiha ye. Ez gelekî spasî we dikim. Ez vê serdanê tiştekî pir mezin dibînim. Ez bi xwe jî gazî me, ji saziya we me û temsîla saziya hevalên gazî jî dikim. Soz didim we ji bo herêma Qamişlo, Amûdê, Tirbespiyê, Ceza, Til Hemîs û hwd. bi hemû hêza xwe xizmet bikim. Ez ê layiqî vî milletî, saziya gaziyan û we bim. Ez dixwazim weke hevalên gazî hûn jî piştgiriya min bikin. Ez dizanim ji her kesî zêdetir hûn ê min fêm bikin û destek bidin min. Ez hatina we ji bo xwe weke hêzeke pir mezin dibînim. Ez ê jî timî li cem we bim. Dixwazim bibim layiqî gel û gaziyên Kurd, Ereb û Suryan.”
Li ser navê Federasyona Gaziyên Bakur û Rojhilatê Sûriyeyê Egîd Efrîn jî erk û wezîfeya Rêvebera Qamişloyê Cîhan Seîd Hesam pîroz kir û ev tişt anî ziman: “Em di kar û xebatên we de serketinê dixwazin. Erka we pir girîng û dîrokî ye. Hûn weke hevalek gazî ku we ev erk wergirtiye, ji bo me cihê serfiraziyê ye. Ev erka we hêviyê dide me û tevahî gelên me. Em bi erk û rêveberiya we bawer in.”
Piştî Egîd Efrîn yek ji rêveberê gaziyan Elî Hesen jî erka Cîhan Hesam pîroz kir û di xebatên wê de serketinê xwest.
Piştî axaftinan gaziyên şer tabloyek weke diyarî dan Rêvebera Qamişloyê Cîhan Seîd Hesam. Cîhan Hesam jî bi wesîleya 100emîn salvegera avabûna Qamişloyê plaketek da gaziyan.
Herî dawî jî wêneyekî giştî hat kişandin.
