Hevserokê KCKê destnîşan kir ku ji bo aştiyeke mayinde divê qada siyasî û hiqûqî bi awayekî berfireh bikeve dewrê. Bayîk derbirî ku heta ziman, çand û îradeya siyasî ya gelê Kurd di nava qanûn û makezagonê de neyê bicihkirin, çareseriyeke rasteqîn çênabe. Bayîk da zanîn ku ji bêyî azadiya fîzîkî ya Abdullah Ocalan jî serkeftina pêvajoyê pêkan nîne.
Hevserokê Konseya Rêveber a KCKê Cemîl Bayik ji ANFê re axivî û têkildarî Pêvajoya Aştî û Civaka Demokratîk daxuyaniyên girîng dan. Bayik di roportajê de bal kişand ser girîngiya azadiya fîzîkî û statuya Rêberê Gelê Kurd Abdullah Ocalan û wiha got: “Statu û azadiya fîzîkî ya Rêber Apo ji bo me gelekî girîng e. Ji ber ku nêzîkatiya li rêberê gelekî nêzîkatiya li hemberî wî gelî ye.” Bayik diyar kir ku bêyî azadiya fîzîkî ya Rêber Apo û rola wî ya çalak, serketina pêvajoyê ne pêkan e.
‘Tevlêbûna bîranînan dilsoziya bi armancên şehîdan re nîşan dide’
Bayik bal kişand ser bîranînên şehîdan ên ku bi deh hezaran kes tevlî bûn û diyar kir ku ev çalakî nîşaneya dilsoziya gel a bi armancên şehîdan re ye. Bayik destnîşan kir ku pêkhatina van bîranînan di vê qonaxê de ji bo pêşîgirtina li spekulasyonan pêwîstiyek bû û ev herikîn weke piştgiriyeke xurt a ji bo pêvajoya aştî û civaka demokratîk nirxand.
‘Zagona çerçoveyî ji aliyê ziman û naverokê ve kêm e’
Derbarê zagona çarçoveyê ya ku li Meclîsê hatine qebûlkirin de, Bayik diyar kir ku wan ev zagon ne wekî zagoneke bêçekbûnê ya yekalî, wekî “zagona destpêkê ya pêvajoyê” dîtine. Bayik cihnegirtina peyva Kurd di zagonê de jî rexne kir û anî ziman ku gavên demokratîkbûnê bi vekirî nehatine destnîşan kirin. Bayik daxuyand ku ji ber van sedeman zagon ji aliyê ziman û naverokê ve kêm e.
‘Bi têkoşîna rêxistinî serkeftin pêkan e’
Bayik diyar kir ku xwedîderketina li mîrateya şehîdan bi têkoşîna li nirxên wan dibe û ev nirxandin kirin: “Hebûna gelê Kurd divê bi avakirina civaka demokratîk a xweser û komînal bigihêje encamê. Modernîteya kapîtalîst dijminê civakê ye û tenê bi civakparêzî û têkoşîna rêxistinbûyî serketin pêkan e. Divê bi avakirina civaka demokratik û komînal li armancên şehîdan bên tacîdarkirin.”
‘Bêyî nasîna ziman, çand û îradeya siyasî çareserî çêna be’
Hevserokê KCKê destnîşan kir ku ji bo aştiyeke mayinde divê qada siyasî û hiqûqî bi awayekî berfireh bikeve dewrê. Bayîk derbirî ku heta ziman, çand û îradeya siyasî ya gelê Kurd di nava qanûn û destûra bingehîn de neyê bicihkirin, çareseriyeke rasteqîn çênabe û divê zextên sed salî yên li ser Kurdan bi dawî bibin.
