Serekê Meclîsî Numan Kurtulmuşî îdîa kerd ke prosesî de ereymendiş çin o û vat: “Meclîs de komîsyonêk do bêro awankerdene û do çimdarî bikero. Her çî do wextê xo de bêro kerdene û prosesî de ereymendiş çin o.”
Serekê Meclîsî Numan Kurtulmuşî Serekê Meclîsê Xirwatîstanî Gordan Jandrokovîc reyde meclîs de konferansêkê çapemenîye da. Numan Kurtulmuşî derheqê Prosesê Aştîye û Komelê Demokratîkî de ard ziwan ke her çî do wextê xo de bêro kerdene û wina vat: “Qanûnê çarçewayî ra pey heyetêk ame awankerdene û dest bi xebatan kerdo. Meclîs de zî komîsyonêk do bêro awankerdene. Komîsyono ke partîyan ra yeno meydan, do bêro awankerdene û do çimdarî bikero. Eke hewce bibo do tayê waran de *koordînasyonan* awan bikero. Eke hewce bibo do seba qanûnanê hewceyan amadekarî bikero û meclîs rê bişawo. Her çî do wextê xo de bêro kerdene û prosesî de ereymendiş çin o.”
