Heyetê Îdareyanê Herêmkîyan ê Demokratîkan ê DEM Partî bi eşkerayîyêka nuştekî da zanayene ke endamê înan ê meclîsanê şaredarîyanê şaristananê Tirkîya ke weçînayîşê 31ê adara 2024î de bi îttîfaqê Pêkerdişê Şaristanî ameybî weçînayene, nika ra pey do xebatanê xo binê banê DEM Partî de bidê ramitene.
Heyetê Îdareyanê Herêmkîyan ê Demokratîkan ê DEM Partî derheqê endamanê xo yê meclîsanê şaredarîyanê şaristananê Tirkîya de eşkerayîyêka nuştekî vila kerde ke weçînayîşê îdareyanê herêmkîyan ê 31ê adara 2024î de bi îttîfaqê Pêkerdişê Şaristanî ameybî weçînayene. Eşkerayî de ame dîyarkerdene ke badê weçînayîşê îdareyanê herêmkîyan zaf şaredarî wezîfe ra ameyî dûrîvîstene, ameyî tepiştene, herinda înan de qeyûmî ameyî tayînkerdene û tayê şaredarî zî şîyî partîyanê bînan.
Eşkerayî de ame dîyarkerdene ke derheqê nê averşîyayîşan de înan endamanê xo yê Pêkerdişê Şaristanî reyde kombîyayîşêko hîra kerdo, endaman îradeyê xo mojna ke binê banê DEM Partî de bixebitîyê û Heyetê Îdareyanê Herêmkîyan ê Demokratîkan zî no waştiş ca de dîyo.
Eşkerayî wina ya:
“Pêkerdişê Şaristanî tecrubeyêko biqîymet o ke tede warê cîyayî yê komelkî û sîyasî dormeyê amancanê demokrasîya herêmkîye de ameyî têhet. Hurmetê ma yo vera nê îradeyî gama ke ma ewro erzenê de zî do bêro pawitene. Huqûqo hempar ke ma çarçewaya Pêkerdişê Şaristanî de awan kerdo û îradeyê şarê ma yo ke ser sandoqe de şênber bîyo, seba ma sey berpirsîyarîye do dewam bikero. Ma do xebatanê xo yê meclîsanê şaredarîyan de bingeyê hewceyîyanê şaristanan, demokrasîya herêmkîye û fehmê îdareyo şefaf ser o dewam bikerê. Endamê meclîsê ma sey roja ke ameyî weçînayene heta nika, nika ra pey zî do bi fehmêko ke problemanê hemparan ê şaristanan rê çareserîyan berhem dano, wezîfeyanê xo binê banê partîya ma de bîyarê ca. Bi çimdayîşê têkilîyanê ke bingeyê Pêkerdişê Şaristanî ser o ameyî awankerdene û berpirsîyarîyanê dihetîyan, ma do berpirsîyarîya xo ya vera şaranê Îstanbul û Mersînî bîyarê ca.”
