Eren Keskîne yad kerd ke wexto ke rojnameyê Ozgur Ulke ame bombekerdene, cayê karî yê binê awanîye ê Mustafa Sarigulî bî. Keskîne ard ziwan ke o wext ifadeyê ey zî nêame girewtene û waşt ke rola ey bombekerdiş de bêro tehqîqkerdene.
Parlamenterê Erzincanî Mustafa Sarigul û keyeyê ey ser o 16ê teşrîna verêne de Serdadgerîya Cumhurîyetî ya Stenbolî ra, bi îdîayanê “pakkerdişê mal û milkê ke sûcî ra yeno” û “xapnayîşî”, tehqîqat ame destpêkerdene. Tehqîqatî de îdiayî estê ke Sarigul û keyeyê ey, şirketanê ke welat de û teberê welatî de awan bîyê ser o, çimeyê milyar euroyî pak kerdê û sermîyandarî xapnayê. Îdîayan de gelîrê qeydnêkerdeyî yê ke Sarigulî dewrê Şaredarîya Şişlî de pêvajoyanê îmarî ra girewtê zî est ê. Tehqîqatî de 22 kesî ameyê tepîştene; înan ra lajê Sarigulî Emir û Omer Sarigul, cinîya ey a verêne Aylin Kotile, Serekê Heyetê Rayberîye ê Altinbaş Holdingî Sofu Altinbaş, karsazî Ramazan Argun û Îbrahîm Avci û rojnamevan Murat Agirel zî estê.
‘Ma waşt la Sarigul nêame mahkemekerdene’
Tehqîqatî reyde, derheqê Sarigulî de ê çîyê ke 1990an de qewimîyayî zî ameyî rojdem. Endamê Heyetê Rayraberdişî yê Merkezî yê ÎHDyî Eren Keskîne vat ke nameyê Sarigulî bombekerdişê Ozgur Ulke de zî vîyarto. Keskîne wina vat: “Namê Sarigulî çike wayîrê bayîya otomobîlan û îstasyonê servîsê erebeyan ê qatê binî bî, ame rojdem. Na qeydê dosyayan de zî est a. Ma verê naye zî na mesele arde ziwan. Çike wexto ke Ozgur Ulke ameyê bombekerdene, seba ke bombe awanîye de bêro ronayene, nuqteya tewr muhîme cayê karî yê qatê binî bî. Coka ma o wext zî mesele arde rojdem, labelê Mustafa Sarigul tu wext nêame persayene.”
Keskîne ard ziwan ke Serekwezîra ê wextî Tansu Çillere nê qetlî eşkera kerdî û îşaret kerd ke hem kiştişê karsazanê kurdan hem zî bombekerdişê Ozgur Ulke operasyonêke dewlete bî. Keskîne vat: “Na zaf eşkera bî. Mustafa Sarigul zî 1990yan ra nat raya pêroyî de sey kesêko ke dewleta xorîn reyde têkilî de yo, yeno nasnayene. Bitaybetî wexto ke Şaredarîya Şişlî de bî, derheqê ey de zaf îdiayê dizdîye ameyî rojdem, labelê tu karî nêame kerdene. Serran ra dima, seke raya pêroyî de ame dîyarkerdene, lajê Sarigulî Emir Sarigul û lajê Mehmet Agarî Tolga Agar yewbînî reyde kar kerdêne û ortaxî kerdêne. Belkî nika zî ê ortaxî dewam kenê. Labelê heme nê çîyî na coxrafya de tu wext nêamê persayene.”
‘Her tim têkilîyê Sarigulî û dewleta kûre amêne qiseykerdene’
Keskîne vat ke ewro ê çîyê ke ameyî rojdem, ya ke Sarigul gengeşîya menfeetan de yo, ya seba ke mesela fonî bêro pêçîyayene, ya zî çike Sarigul tevlî Partîya YENÎ bîyo û wazenê zerar bidê ey. Keskîne dîyar kerd ke çapemenîya serekî Sarigulî ser o bi “îdiayê şermî” xeber dana, bitaybetî torê xeberan ê dewlete na mesele ci dana, labelê karê ey yê verêne û îdîayî tu wext nêameyê rojev. Keskîne wina domna: “Derheqê Sarigulî de her wext no şik est bî ke têkilîyê ey yê xorînî est ê, labelê tu wext nêame persayene. Sey nimûne, derheqê bombekerdişê Ozgur Ulke de, sebebê wayîrê cayê kar bîyayîşî ra, gazîyê ifade dayene nêame kerdene û tu wext tu pers ci rê nêame persayene. Na heme nimûneyêko girs ê bêcezayîye bî. Wexto ke rojname ame bombekerdene, heval ê ma Ersin Yildiz ganê xo ra bî. Ma o wext avûkatê rojnameyî bî. Ewro her çî yeno munaqeşekerdene, mi zî waşt ke ê çîyî ke vîyartî reyna bîyarî vîrî.” (Çime: MA / Ceylan Şahinli )
