Endama Konseya Serekîya Pêroyî ya KCKyî Sozdar Avesta tekîd kerd ke hemleya entegrasyonî ya Şingalî gamêka muhîm a û ard ziwan ke seba şarê êzîdîyan çîyo tewr muhîm xopawitiş o.
Sozdar Avesta bernameyê taybetî yê Stêrk TVyî de Prosesê Aştî û Komelê Demokratîkî, hemleya entegrasyonî ya Şingalî û averşîyayîşanê Rojawanî erjnayî. Avesta vat ke Têgêrayîşê Azadîye heme gamê bingeyinî eştî la rewşa Rayber Apoyî de hîna bedilîyayîş çin o û ard ziwan: “Gerîla Vakurê Kurdîstanî ra ancîya, cayê sey Metîna ameyî vengkerdene, 8ê teşrîna verêne ra nat 20 rojî ra zêde vîyartî la gamêka cidî nêameya eştene. Ganî Rayber Apo sey koordînatorê Heyetê Aştî û Sîyasîbîyayîşî dekewtêne dewre. Heta ke şertê xebata azade ya Rayber Apoyî nêrê temînkerdene û sozê dîyayeyî nêrê pratîkkerdene sey têgêrayîş çîyêk nêmendo ke ma bikerê. Hukmatê AKPyî wazeno seba weçînayîşan wext qezenc bikero û prosesî bi konjonkturê herême reyde girê dano, no xoxapitiş o. La Têgêrayîşê Azadîye qet bê alternatîf û bê têkoşîn nêmendo.”
‘Koyê Şingalî tena koyêk nîyo, kultur, tarîx û estbîyayîş o’
Avesta vat ke entegrasyono leşkerî ke badê xoverdayîşê 12 serran ê komelê êzîdîyan 26ê teşrîna verêne 2026î de mabênê YBŞ-YJŞ û artêşa Iraqî de bî, berê demêkê neweyî akerd û ard ziwan: “Ez nê hemleyî şarê Şingalî rê pîroz kena. Bingeyê nê têkoşînî de keda girde ya Rayber Apoyî est a. Reya verêne dewleta Iraqî bi mesajêkê fermî heqanê komelê êzîdîyan qebul kena. La no destpêk o. Serkewtişê na peymane bi cidîyetê bicaardişê aye ra girêdaye yo. Meseleya komelê êzîdîyan meseleyêka sîyasî û komelkî ya, coka ganî entegrasyono komelkî, sîyasî û kulturî zî bêro kerdene, îdareyê herêmkî bêro naskerdene û mekanîzmayê xopawitişî bêrê pawitene. Koyê Şingalî tena koyêk nîyo, kultur, tarîx û estbîyayîş o, ganî hêzê Şingalî uca de bimanê. Seba vejînê komelê êzîdîyan çîyo tewr muhîm xopawitiş o. Kes nêkewo rehawetî.”
‘Tol seba ma awankerdişê îradeyê cinîya êzîdîye bî’
Avesta vat ke YJŞ Rojhelatê Mîyanênî de bîya sembol û ard ziwan: “Ma sey Têgêrayîşê Azadîya Cinîyan ê Kurdîstanî 2014î de soz dabî ke ma do tolê cinîyanê êzîdîyan bigîrê. Tol seba ma awankerdişê îradeyê cinîya êzîdîye bî. Huyayîşê lewanê kênekanê êzîdîyan ê merasîmî girewtişê tolê tewr girdî bî. Na hêza cinîyan artêşa Iraqî de reya verêne bi fermî ca gêna û seba heme cinîyanê Iraqî model a.” Avesta ê ke beşdarîya YBŞ-YJŞyî sey teslîmîyet name kenê û persê sey “Êzîdîyî kurd ê yan ney?” vejenê ver, sey provokasyon û manîpulasyon name kerdî û vat: “Nê dormeyî hetê merkezêk ra yenê rayberkerdene. Komelê êzîdîyan komelêko birûmet o, estbîyayîşê kurdê azadî yo. Heqê kesî çin o ke vajo ‘ganî ti sey mi bibî’.” Avesta venga heme êzîdîyan da û vat: “Ganî heme êzîdîyî, keyeyê Mîrî û Baba Şêx zî, nê hemleyî sey azadî û xelasîya xo bivînê, dijberîyanê mabênê xo hetêk ra verdê û yewîya xo bivirazê.”
‘Entegrasyono demokratîk nêyeno a mana ke têkoşîn vinderto’
Derheqê Rojawanî de Avesta hêrişê nijadperestî yê vera şarê ke agêreno herra xo, bi tundî mehkûm kerdî û vat: “Nê hêrişî hadîseyê şexsî nîyê, prosesêko plankerde û rêxistinbîyaye yo, ê zîhnîyetê DAÎŞî kirişenê. Ganî hukmatê demkî yê Şamî şertanê agêrayîşê biemnîyet temîn bikero û îdare û hêzê pawitişî yê Rojawanî vernîya nê hêrişan bigîrê. Entegrasyono demokratîk nêyeno a mana ke têkoşîn vinderto. Xopawitiş dewre de yo û pawitişê xo vera heme hêrişan heqo meşrû yê şarê ma yo. Ganî şarê ma yê her çar parçeyanê Kurdîstanî têkoşînê xo hîna berz bikero.”
