Îspanya de vizêr qezaya di trênanê lezan de tewr tayê 69 kesî merdî û 100 kesî ra zafêr zî birîndar bîyî. Goreyê agahîyanê peyênan 57 kesî hema nêweşxaneyan de yenê tedawîkerdiş. Xebatê cigêrayîş û xelasnayîşî dewam kenê.
Qeza roja çarşeme xeta trêne ya Madrid-Sevîlyayî ser o virazîya. Ca nêzdîyê qesebeya Urdayî ya wilayetê Toledoyî de yo. Trêneyêka leze ya Renfe peyra ginaye trêneyêka Iryo ke xete ser o vindertbî. Qezaye de çend vagonî xete ra vejîyayî.
‘Sebebê qezaye û tehqîqat’
Goreyê agahîyanê verênan ê Wezîrê Neqlîyatî yê Îspanya Óscar Puenteyî problemêk sîstemê têkilîye yê kompîturî de virazîyabi. No problem bîbi sebebê vindertişê otomatîkê çend trênan. Dima merkezê kontrolî destûr da trêna Renfe ke rayîrê xo dewam bikero. La sînyalo sûr ê tehlukeyî hema aktîf bî û trêneyêka bîne verê aye de vindertbî.
Tehqîqat do eşkera bikero ke çira no destûr ameo dayîş û kamcîn xeta bîye sebebê nê hedîseyî.
Polîsanê Îspanya derheqê hedîse û karkerê merkezê kontrolî de ke destûrê hereketî dabi, tehqîqat da destpêkerdiş. Dadgehî qeydê trênan û datayê merkezê kontrolî waştê ke rêza hedîseyan û mesulîyetê muhtemelî bêrê tesbîtkerdiş.
