Îstanbul – Kenan Altûn 30 serran ra pey hepis ra ame verdayene. Kenan Altûnî da zanayene ke nika ra pey zî çi destê ey ra bêro do bikero û do têkoşînê azadîye dewam bikero.
Kenan Altûn serra 1996î de Bedlîs de ameybî tepiştene û cezaya hepsê heta-heta ey rê ameybî birnayene. Kenan Altûn 30 serran ra pey Hepisxaneyê Maltepe yê Îstanbulî ra vejîya. Ey vernîya hepisxaneyî de hetê keyeyê xo, îdarekaranê Komeleya Ardim û Piştîpêdayîşî ya Keyeyanê Hepsîyan û Mehkûman a Marmara (MATUHAY-DER) û zaf kesan ra bi vilan ame pêşwazîkerdene. Pêşwazîkerdişî de sloganê “Bijî berxwedana zindanan” ame eştene.
‘Ganî ma seba serkewtiş û rojanê pîrozan bixebitîyê’
Kenan Altûnî tîya de qisey kerd û da zanayene ke 30 serran ra pey ame verdayene û wina vat: “Ez zaf xemgîn a, çunke hema zî bi hezaran hevalê ma hepis de yê. Hevalêkê ma yo 84 serreyî hema hepis de yo. Hevalanê ma heme kesan rê silam şawit. Moralê hevalan weş o. Ganî ma 24 saetî seba azadîya Rayber Apoyî hereket bikerê û bixebitîyê. Ganî ma seba ameyoxêko azad cayê xo de nêronişê û seba serkewtiş û rojanê pîrozan bixebitîyê. Çi destê ma ra bêro ma do bikerê, çunke ma zanê ke barê ma giran o. Ma merheleyêka muhîme ra vîyarenê; na merhele nêyena a mana ke ma cayê xo de vindê.”
Badê eşkerayîye Kenan Altûn keyeyê xo reyde şî qezaya Umranîye ya Îstanbulî. Ame zanayene ke ey do çend rojan ra pey şêro Bedlîs.
