Heyetê Îdareyanê Herêmkîyan ê Demokratîkan ê DEM Partî bi amancê gandarkerdiş û averberdişê kurdkî şaredarîyan de seba ronayîşê serekîyanê daîreyan û mudirîyan agahînameyo newe weşana.
Heyetê Îdareyanê Herêmkîyan ê Demokratîkan ê DEM Partî derheqê bicaardişê qeraranê Konferansê Îdareyanê Herêmkîyan ê Demokratîkan de ke 8-9ê hezîrana 2026î de ame kerdene, şaredarîyan rê agahînameyêko newe şawit. Goreyê qeraranê konferansî amanc o yo ke şaredarîyanê şaristananê girdan de Serekîya Daîreya Gandarkerdiş û Averberdişê Ziwanan û şaredarîyanê bînan de zî Mudirîya Gandarkerdiş û Averberdişê Ziwanan bêro ronayene.
La etudanê huqûqî û îdarîyan de ame dîyene ke bi sebebê mewzûatê mewcûdî seba rasterast ronayîşê nê yewînan tayê sînordarîyî est ê. Naye ser o heyetî qerar da ke seba newekerdişê nameyanê yewînan ê cetwelanê norm qadroyan ê şaredarîyan cehd bêro kerdene. Agahînameyî de ame waştene ke Wezaretê Dorme, Bajarwanî û Bedilîyayîşê Îklîmî rê nuşteyê talebî yê fermî bêrê şawitene ke şaredarîyanê şaristananê girdan de serekîya daîre û şaredarîyanê bajar, qeza û beldeyan de zî mudirîyî bêrê ronayene.
Heyetî bale ante ser o ke prosesê huqûqî yê bedilîyayîşê mewzûatî dewam keno zî ganî şaredarî xizmet û falîyetanê xo yê warê ziwanê dayîke bê birnayîş dewam bikerê. Agahînameyî de ame dîyarkerdene ke averberdiş, dezgehkerdiş û vilakerdişê xebatanê ziwanê dayîke binê banê îdareyanê herêmkîyan de hewceyîyêka bingeyên a û nê xebatî mesulîyetê îdareyanê herêmkîyan ê fekveranêdayeyî ra yê. Heyetî waşt ke şaredarî xebatanê xo yê gandarkerdiş û averberdişê kurdkî bê mabên dewam bikerê.
