ÎHDa Îzmîrê bal kişand ser rewşa girtiyê nexweş Neytullah Bayram û wiha got: “Ji ber sirgûnkirinan dermankirina wî nayê temamkirin û her ku diçe kîlo dide. Divê daxwaza sewqkirinê ya Neytûllah Bayram were pêkanîn.”
Şaxa Komeleya Mafên Mirovan (ÎHD) a Îzmîrê, ji bo balê bikişîne ser rewşa girtiyên nexweş li pêşiya SumerBank a kevn a Konakê, hatin cem hev. Li çalakiyê pankarta “Girtiyên nexweş dimirin, bêdeng nemîne, nebe hevparê sûc” hat vekirin. Daxuyaniya çapemeniyê li ser navê girseyê ji layê Rêvebera Şaxa ÎHDa Îzmîrê Vetha Aydin ve hat xwendin. ÎHDê di çalakiya vê hefteyê de bal kişand ser rewşa girtiyê nexweş Neytûllah Bayram ê li Girtîgeha Tîpa F a Jimar 2 a Kandira Kocaeliyê tê ragirtin.
‘Neytûllah Bayram tevî rewşa xwe ya giran nayê dermankirin’
Vetha Aydin diyar kir ku Neytûllah Bayram, 28 sal in li girtîgehê ye, bi salane tê sirgûnkirin, ji ber sirgûnkirinê dermankirina wî nayê temamkirin û wiha got: “Di sala 2015an de berê sewqî Osmaniyeyê, paşê jî sewqî Girtîgeha Tîpa F a Jimar 2 a Kandirayê hat kirin. Ji ber vê yekê dermankirina wî nîvco ma. Tevî ku 11 sal bi ser de derbas bûne jî dermankirina wî ya dev û diranan nehatiye temamkirin. Lê piştî demeke dirêj bi hinceta ku di hestiyê şewiya wî heliyaye hat ragihandin ku tedawiya împlantê nayê kirin. Tevî vê yekê planeke alternatîf a dermankirinê nehat kirin. Neytûllah Bayram îro nikare xwarinê bicû. Nikare xwarinên hişk bixwe, xwarina wî bi awayekî cidî sînordar dibe û ji ber vê yekê bi domdarî kîloyan dide.”
‘Divê Neytûllah Bayram demildest bê berdan’
Di dawiya axaftina xwe de Vetha Aydin diyar kir ku ji bo dermankirina wî were temamkirin û sûdê ji piştgiriya malbata xwe bigire divê daxwaza sewqkirina girtîgeha Amedê yan jî girtîgeheke nêzî malê bê qebûlkirin û wiha got: “Dayik û bavê wî yên temen mezin in, bi salan e nikarin serdana wî bikin. Ev rewş ji bo girtiyekî ku nexweşî û pirsgirêkên xwarinê hene giran e, bêparmana ji piştgiriya civakî rewşê girantir dike. Divê înfaza Neytûllah Bayram bê taloqkirin û di cih de bê berdan. Divê ji aliyê saziyeke tenduristiyê ya ku ji pisporên cerahiya dev, diran û şewiyê û gastroenterolojiyê pêk tê ve nirxandineke giştî bê kirin. Divê rê neyê dan ku dayîna kîloyan berdewam bike.”
Daxuyanî piştî çalakiya rûniştinê ya 5 deqeyî, bi dawî bû.
