PFDK’yî semedê hedîseyanê saha yê maçê Gençlerbirligî û Amedsporî Amedsporî rê cezaya pereyan birnaye. La PFDK’yî sloganê qilêrinî yê maçê Mardînspor û Bursasporî bêceza verdayî.
Komîteya Dîsîplînî ya Futbolê Profesyonelî (PFDK) qerarê xo yê hedîseyanê hewteyê 7. yê Lîgê Superî eşkera kerd. PFDK’yî semedê sloganê “qilêrin û xirabî” yê heskerdoxanê Gençlerbîrlîgî yê maçê Gençlerbîrlîgî-Amedspor ke Ankara de ame kaykerdene seba kartanê heskerdoxan ê peyê qaleya vakurî, trîbuna rojava û vîp’î qerar da. PFDK’yî waşt ke nê kesî bêrê astengkerdiş û dekewtişê înan ê maçanê bînan qedexe bibo.
PFDK’yî Amedsporî rê zî 280 hezar lîreyî cezaya pereyan birnaye. Komîteye nê ceza sey “hedîseyê qade” name kerde la îzah nêkerd ke nê hedîseyî çi yê.
‘Bursasporî rê semedê sloganê qilêrinî ceza çin a’
Lîga 1. ya Trendyolî de Bursaspor û Mardîn 1969 Spor 11ê teşrîna verêne de stadê Bursasporî de yewbînan reyde kay kerd û Bursasporî maç 2-1 vîndî kerd. Heskerdoxanê Bursasporî heta peynîya maçî sloganê qilêrinî berz kerdî; vîdeoyê nê sloganan platformanê medyaya dîjîtale de bi hezaran rey ameyî parekerdene. Taybetî sloganê vera kalecê Mardînsporî Erce Kardeşler kewtî rojeve.
La PFDK’yî goreyê xalanê 52/2 û 46/1 yê FDT’yî semedê hedîseyanê stadê Bursasporî rê tena 140 hezar TL cezaya pereyan birnaye. Nê xalî hedîseyê stade yê ke temaşekerdox, endamê klubî yan futbolkaran kerdê, sey eştişê çîyanê xerîban stade, dekewtişê temaşekerdoxan stade û veşnayîşê meşaleyan, xo mîyan de genê. Sloganê qilêrinî yê heskerdoxanê Bursasporî ke heme maç de hetê her kesê ke maç TV ra temaşe kerdêne ra ameyî eşnawitene, bêceza mendî. No reyna mojna ke PFDK qeraranê xo de çiqas terefgir o.
