Avdel Sayin ke newe hepisxane ra vejîyayo, dîyar kerd ke prosesî reyde zî binpaykerdişê heqanê hepsîyan dewam keno û vat: “Heqê ma yê sey rojname, kitab û pêdîyayîşanê keyeyî temamen ameyêne astengkerdene û keyeyî ameyêne mexdûrkerdene.”
Hepisxaneyanê Tirkîya û Vakurê Kurdîstanî de binpaykerdişê heqanê hepsîyan dewam keno. Hepisxaneyê Emnîyetê Berzî demanê peyênan de bîyî merkezê binpaykerdişan û bi tatbîqatanê keyfîyan rojeve de yê.
Avdel Sayin serra 2006î de bi bahaneya “endamîya rêxistine” ame destbendkerdene û 3 aşmî hepisxane de mend. Dima teber ra ame muhakemekerdene û serra 2009î de cezaya ey ameye birnayene. Cezaya ey serra 2016î de hetê dadgehê berzî ra ameye tesdîqkerdene û 2021î de o ame tepiştene. Sayîn Hepisxaneyê Emnîyetê Berzî yê Wanî û Hepisxaneyê Emnîyetê Berzî yê Suluca yê Edene de mend; 25ê êlule 2026î de cezaya ey qedîya û ame verdayene. Avdel Sayin ke 19 rojî yo hepisxane ra vejîyayo, derheqê problemanê hepisxaneyan û Prosesê Aştîye û Komelê Demokratîkî de qisey kerd.
“Heqê hepsîyan ê cuye yenê astengkerdene”
Sayinî dîyar kerd ke 2024î de sirgunê Hepisxaneyê Emnîyetê Berzî yê Suluca yê Edene bî û wina vat: “Ez 18 aşmî hepisxaneyê Edeneyî de menda. Badê ke ma ameyî berdene, roje de tena saetêk destûr dîyayêne ke ma vejîyê hewagirewtiş. Şert û mercî uca de zaf zehmet bîyî. Heqê ma yê sey rojname, kitab û pêdîyayîşanê keyeyî temamen ameyêne astengkerdene û keyeyî ameyêne mexdûrkerdene. Nê tatbîqatî hema zî dewam kenê.”
“Proses seba şarê kurdî serkewtişêko pîl o”
Sayinî bale ante destpêkerdişê prosesê neweyî ser o û vat: “Wexto ke ez ameya sirgunkerdene, prosesêkê neweyî dest pêkerdbî û qiseykerdişê Rayberîye newe ra resabî sewîyeyêka muhîme. No rayîro newe ke vejîyayo meydan, seba şarê kurdî serkewtişêko pîl o. Têkoşîno ke heta ewro ameyo kerdene, resayo sewîyeya azadîye. No model û têkoşîn tena seba şarê kurdî ney, seba heme neteweyanê dinya zî nimûneyêko newe û muhîm o.”
“Ganî proses raşt bêro vatene”
Sayinî venga heme sazgehanê kur, tirk, ereb û farisan da ke wayîrê prosesî bivejîyê û qiseykerdişê xo wina qedêna: “Kede û xoverdayîşêko zaf pîl ameyo dayene la çi heyf ke no proses hema zî mîyanê ciwan û komelî de baş fehm nêbîyo. Ganî komel bêro rêxistinkerdene. Tena sazgehê kurdan ney, ganî sazgehê dewlete zî nê prosesî raşt bîyarê ziwan. Eke no proses raşt fehm nêbo eşkeno netîceyanê xiraban bîyaro. Êyê ke fehm kenê, ganî şîrove bikerê û komelî ra vajê.”
