Îstanbul – Dayîka Aştîye Meryem Bulut zî qurbananê Qirkerdişê 10ê Teşrîna Verêne ra yew a. Meryem Bulut seba aştîye yew deqe zî nêvindertêne; aye qirkerdiş de aştîye ra xatir waşt. Dayîka Aştîye Sultan Bozkurte dîyar kerd ke embaza înan Dayîka Meryeme seba aştîye şîbî Ankara.
Qirkerdişê Garê Ankara yê 10ê Teşrîna Verêne ser ra 11 serrî vîyartî. Di endamê DAÎŞ’î Sûrîye ra ameyî Tirkîya. Înan paytextê Tirkîya Ankara de hêrişê vera Mîtînga Aştîye kerd. Hêriş de 104 kesî ganê xo ra bîyî. No hêriş hema zî bi zelalî nêameyo roşnkerdiş û berpirsîyaran ra hesab nêameyo persayîş. Qurbanan ra yew zî Dayîka Aştîye Meryem Bulut bîye.
‘Her ca de çalakvan a’
10ê teşrîna verêna 2015î de Ankara de domanî, pîl û kalî zî tede 104 kesî ameyî kiştiş. Karker, kedkar, aştîwaz, azadîwaz û demokrasîwazê ke Kurdîstan û Tirkîya ra ameybî, a roje verê Garê Trênî de ameybî têhet ke waştişê aştîye bidê eşnawitiş. Meryem Bulut ya 71 serreyî zî nê aştîwazan ra yew bîye. Aye Êlih ra bar kerdbî qezaya Îskenderûn ya Hatay û 25 serrî uca ciwîyabî. Îskenderûn de lajê aye Ahmet tewrê Newroze bî û ame destbendkerdiş. Polîsan Dayîka Meryeme rê vat ke ‘ma do saetêk ra pey lajê to verdê’ la bi rojan vera Ahmetî îşkence ame kerdiş û dima ame girewtiş. Dayîka Meryeme şîye verê hepisxaneyî û a roje ra pey koti çalakî bibo, a zî uca bîya. Dima bar kerd Îstanbul; uca zî tim yan Qada Galatasarayî de yan zî verê hepisxaneyan de bîye.
‘Vera şerî bîya mertalêko ganî’
Wexto ke 2015î de Kurdîstan de şer reyna dest pêkerd, Dayîka Meryeme Îstanbul ra şîye Licê û bîya mertalêka ganî. Wexto ke sebebê şîyayîşê aye ame persayîş, aye vat: ‘Heta ciwanî mirenê, wa ez bimira.’ 40 rojî Licê de menda. 1995î de, wexto ke yew lajê aye leşker û yew zî gerîla bî, şîye Cizîr û bîye mertalêka ganî. Cizîr de ame girewtiş û Hepisxaneyê Mardîn de menda. Dozgerî persa: ‘Ti çira vera leşkeran vindena?’ Aye cewab da: ‘Yew lajê mi gerîla yo, yew zî leşker o; seba ke yewbînan nêkişê, seba aştîye şîya.’ Torna aye Çekdar tewrê Têgêrayîşê Azadîya Kurdîstanî bî û şerê vera DAÎŞ’î de ganê xo ra bî.
‘Gişta dewlete zî nê qetlîamî de est a’
Dayîka Meryem Bulut Îstanbul ra şîye Ankara. Wexto ke keyeyî xebera teqayîşî eşnawite, telefonê Dayîka Meryeme kerd; polîsêk telefon akerd û vat: ‘Bêrê dayîka xo berê.’ Meryem Bulute 71 serreyî de hesret û eşqê aştîye zerrîya xo de verda û paytextê Tirkîya de aştîya nêameye ca ra xatir waşt. Endama Meclîsê Dayîkanê Aştîye yê Îstanbulî Sultan Bozkurte embaza xo Meryem Bulute ser o wina vat: “Dayîka Meryeme her ca de bîye; ma pîya şîyêne çalakîyan. Dayîka Meryem bi destê dewletêk wina wehşîyane ameye qetilkerdiş. 11 serrî yo ke kiştoxî bi zelalî nêameyê muhakemekerdiş; dadgeh formalîte dewam keno. Gişta dewlete zî qetlîamî de est a. 104 embazê ma ameyî kiştiş. Dayîka Meryeme seba aştîye şîbî Ankara; waştêne ke aştî bêro ca. Ewro zî aştî est a la tu game nêameya eştiş. Ma wazenê ke gamî bêrê eştiş. Ez Dayîka Meryeme û heme şehîdan birûmet vîr ana.”
