MKG’yî dîyar kerd ke aşma êlule de teda vera rojnamegeranê cinîyan û warê dîjîtale dewam kerd. MKG’yî vat ke resayîşê hesabanê medyaya dîjîtale yê dezgehanê çapemenîye, rojnamegeran, rêxistinanê cinîyan û pawitoxanê heqanê merdiman ame astengkerdene.
Komeleya Rojnamegeranê Cinîyan a Mezopotamya (MKG) raporê binpaykerdişê heqanê rojnamegeranê cinîyan ê êlula 2026î platformanê xo yê dîjîtalan de pare kerd. MKG’yî raporî de bale ante astenganê qade, şertanê xebate yê rojnamegeranê cinîyan û sansurê çapemenîye ser o.
MKG’yî dîyar kerd ke aşma êlule de teda bi şeklanê cîyayan dewam kerd. Raporî de wina ame vatene: “Bi tehqîqat û dawayanê vera çalakîyanê rojnamegerîye, bi astenganê verê xeberan, bi destbendkerdiş, tepiştiş, tehdît, hêriş û sansurê dîjîtalî warê xebate rojnamegeran rê teng bîye. Raporê xeberan û çalakîyê rojnamegerîye sey bingeyê sucdarkerdişî yenê xebitnayene. Muhakemeyê serran dewam kenê, dawayê neweyî yenê akerdene û qerarê tepiştişî dewam kenê. Nê pêro mojnenê ke tedaya dadwerîye domdar bîya.”
MKG’yî ard ziwan ke astengê qade şertanê xebate zî giran kenê. Goreyê raporî, destdekerdişê xeberan, qade ra vetişê rojnamegeran, tehdîtan û hêrişan mojna ke resayîşê xeberan hîna zaf beno sînordar. Raporî de wina ame vatene: “Aşma êlule de qada dîjîtale zî caganê ke teda tede zêde bîye, înan ra yew bîye. Resayîşê platformanê dîjîtalan ê zaf koman, rojnamegeran, dezgehanê medya, rêxistinanê cinîyan û pawitoxanê heqanê merdiman ame astengkerdene. Bi no qayde resayîşê raya pêroyî ya dezgehanê haydarîye zî ame sînordarkerdene.”
MKG’yî dîyar kerd ke cayanê karî de zî teda dewam kerd. Goreyê raporî, kar ra vetiş, mobing û şertê bêemnîyetî zêde bîyî û estbîyayîşê cinîyan qada çapemenîye de zehmet bîyo. Raporî de wina ame vatene: “Binpaykerdişê heqanê merdiman ê vera rojnamegeran azadîya çapemenîye û heqê haydarbîyayîşê raya pêroyî ra cîya nêyenê erjnayene. Ganî muhakemekerdiş û tersnayîşê rojnamegeran, astengkerdişê weşanê xeberanê înan û qefilnayîşê platformanê înan ê dîjîtalan bireso peynî. Ganî rojnamegerê tepîşteyî bêrê verdayene û heme astengê verê xebatanê rojnamegeran bêrê wedarnayene.”
Goreyê statîstîkanê raporî, aşma êlule de vera 3 rojnamegeran hêriş bî, keyeyanê 2 rojnamegeran de sereştiş ame kerdene, 3 rojnamegerî ameyî destbendkerdene û 2 rojnamegerî ameyî tepiştene. Derheqê 3 rojnamegeran de dawa ame akerdene. 2 rojnamegeran rê bi pêroyî 6 serrî, 5 aşmî û 24 rojî cezaya hepsî ameye dayene. 14 dosyayan de muhakemeyê 36 kesan dewam kenê; karê 3 rojnamegeran ame qedênayene. 4 keyepelî ameyî qefilnayene, resayîşê tewr kêm 810 platformanê dîjîtalan û 15 xeberan ame astengkerdene. Lîsteya MKG’yî de 10 rojnamegerê cinî tepîşte yê: Derya Okatane, Hatice Dumane, Nadîye Gurbuze, Ozden Kinike, Oya Lale Ozan Arslane, Yelis Ayaze, Songul Yucele, Fatma Sibel Gurcihane, Îrem Delice û Tugba Tekereke. Derya Okatane 2ê teşrîna verêne de ameye tepiştene.
