Endama Koordînasyonê KJK’î Besê Erzîncane dîyar kerd ke heqîqetê komelî, cuye û azadîye raşterast bi famkerdena heqîqeta cinîye rê girêdaye ya. Erzîncane îfade kerd ke felsefeya Cinî Cuye Azadî formulêk unîversal o xelisnayîş û awankerdena cuya newe ya û wina va: “Konseptê xobîyayîşî, bingeya xeta azadîya cinîye ya. Şorişêk ke tede cinî neyêro azadkerdene, nêeşkeno komelî azad bikero. Cuya komînal û awankerdena komelê demokratîk bê îrade û tewrbîyayîşê cinîye nêyena fikirîyayene. Têkoşînê zereyî û pakbîyayîşê tesîranê sîstemê serdest ra, seba her tefergîrê azadîye hewcedarîyêk qetî ya.”
Endama Koordînasyonê KJK’î Besê Erzîncane, hûmara 8. ya Kovara Ozgur Halkî de, bi meqale ya xo ya bi sernuştê “Cinî Cuye Azadî: Heta heqîqetê cinîye nêro famkerdene heqîqetê komelî nêyena famkerdene” felsefeya xobîyayîşî, vurnayîşê kesîtî û rolê pêşengîya cinîye têkoşînê azadîye de bi xorînî erjnena. Erzîncane nuştişê xo de dîyar kena ke heqîqetê komelî, cuye û azadîye raşterast bi famkerdena heqîqetê cinîye rê girêdaye ya.
‘Konseptê xobîyayîşî bingeya xeta azadîya cinîye ya’
Besê Erzîncane destpêka meqaleya xo de bale ancena muhîmîya nasnayîşê xobîyayîşî ser o û dîyar kena ke awankerdena ferd û komelê azad tena bi zêhnîyetê xobîyayîşî mumkin o. Besê Erzîncane îfade kerd ke xobîyayîş, verê her çî xelisnayîşê hişmendîya serdest ê camêrdan ra û sîstemanê kanperest ra de yo. Besê Erzîncane nuşteyê xo de wina vana: “Seba ke cinî azadîya xo ya raşten awan bikero, ganî bale bido cewherê xo, tarîxê xo û newe ra xo şirove bikero. Goreyê meqaleye, xobîyayîş tena vindertişêko ferdî nîyo, eynî wextî de wayîrvejîyayîşê erjanê exlaqî û polîtîk ê komelî yo.”
‘Şorişê Kurdîstanî cewherê xo de şorişê cinîye yo’
Derheqê babete de, Besê Erzîncane vat ke seba serkewtena têkoşînê azadîya Kurdîstanî de, pêşengîya cinîye û xeta azadîya cinîye şertêko bingeyîn o. Erzîncane nuştişî de dîyar kerd ke şorişêk ke tede cinî neyêro azadkerdene, nêeşkeno komelî azad bikero û tu wext nêbeno şorişêk komelkî yo raşten. Besê Erzîncane nê erjnayîşan kena: “Şorişê Kurdîstanî roja ewiline ra bi esasê azadîya cinîye ser o aver şîyo û ewro zî no krîter muhîmîya xo paweno. Averşîyayîşê şorişî û garantîkerdena ameyoxêko demokratîk tena bi pêşengîya fikrî û rêxistinî yê cinîye mumkin beno.”
‘Awankerdena kesîtîya şorişger kede û fedakarîye wazena’
Meqale de Besê Erzîncane rexneyê muhîmî formanê kesîtîya yê urf û adetî û kapîtalîstî kena û muhîmîya awankerdena kesîtîya newe ya şorişger roşn kena. Nuştişî de ame dîyarkerdene ke vurnayîşê zêhnîyetî û newekerdena kesîtîya prosesêk o ke asan nîyo; kedêka domdar, rexne û xorexnekerdiş wazena. Nuştişî de nê erjnayîşî ca gênê: “Kesîtîya ke vara kanperestî û cinsîyetperestîye têkoşîn nêdo, nêeşkena bibo pêşengê prosesanê azadîye. Nê semedî ra, rojane têkoşînê zereyî û pakbîyayîşê tesîranê sîstemê serdest ra, seba her tefergîrê azadîye hewcedarîyêk qetî ya.”
‘Sloganê cinî cuye azadî felsefeyêk dînya ya’
Babetanê eseasî yê meqale de ser o yena vindertişî ra yewe zî, vilabîyayîş û xorînîya felsefeya “Cinî Cuye Azadî” ya. Besê Erzîncane dîyar kena ke no slogan tena çekuyêk yan zî têsadufêk nîyo, formulêk cîhanşumûl ê xelisnayîş û awankerdena cuya newe ya û wina domna: “Felsefeya ke nê sloganî de vila bena, ewro sînoranê herême ra vîyart û bîyo çimeyê îlhamî seba pêro têgêrayîşanê azadîwazan ê dînya. Girêdayîşo raşten ê mabenê cinî, cuye û azadîye de tîpolojîya tewr raşten a cuya piştîdayene û demokratîk merdimîye rê mojnena.”
‘Rolê azadîya cinîye mîyanê cuya komînal de sereke ya’
Besê Erzîncane dîyar kerd kena ke cuya komînal û awankerdena komelê demokratîk bê îrade û tewrbîyayîşê cinîye nêyena fikirîyayene. Dewamê meqale de wina yena vatene: “Beşkerdena xebate, qerardarî û rayraberdena cuya komelkî de, nirx û nêzdbîyayîşanê cinîye garantîya krîteranê demokratîk ê. Tewrbîyayîşê cinîye yê pêro waranê komînal de, rayîr verê hişmendîya burokratîk û serdest gêna û rihê piştîdayîşî xurt kena. Pratîzekerdişê awankerdena komînal tena bi hişmendîyêk ke azadîya cinîye merkezê xo de rona, eşkena serbikewo.”
‘Xurtkerdişê qerardarîye û qarantîya ameyoxêko azad’
Peynîya nuştişî de Besê Erzîncane bale ante qerardarîya xeta azadîye de û vindertişê vera astengîyan ser o. Besê Erzîncane dîyar kerd ke xoverrodayîşê vera pêro hêrişan û zextanê sîstemî tena bi rayîrê rêxistinbîyayîş û qerardarîya îdeolojîk serkewena. Erzîncane nuştişê xo bi vengdayîşê xurtkerdena têkoşînî, xorînkerdena hişmendîya xobîyayîşî û hîrakerdena xebatanê azadîya cinîye pêro warê cuyayîşî de qedêna.
