Muzîsyen Mehmûd Berazî Festîvala Fîlman a Mîyanneteweyî ya Silêmanî ya 6ine de xelate girewte. Festîvala ke 9ê êlule roja şehadetê Yilmaz Guneyî de ameye destpêkerdene do hata 15ê êlule dewam bikero.
Festîvala Fîlman a Mîyanneteweyî ya Silêmanî ya 6ine vizêr Silêmanî de ameye destpêkerdene. Pîya bi rejîsor û produktoranê fîlman,temsîlkarê sîyasî û hukmatî û çar parçeyanê Kurdîstanî û teberê welatî ra xeylê kesî tewrê ci bîyî.
Festîvale 9ê êlule roja şehadetê rejîsorê kurd û sînemadar Yilmaz Guneyî de ameye destpêkerdene. Seba festîvale 31 welatan ra nizdê 650 muracatê fîlman ame kerdene, jurî 23 welatan ra 108 fîlmî kerdî mîyanê programê festîvale.
Çarçewaya festîvale de xelate dîyaye muzîsyeno kurd Mehmûd Berazîyî. Berazîyo ke bi xebata xo ya muzîkê kurdî yê tradîsyonî bi muzîkê modernî ano têhet, yeno naskerdene, Hunergeha Welat û Komunê Fîlmî reyde xebatê hazirkerdiş û vilakerdişê eseranê muzîkê şarî yê tradîsyonî rayra berdî.
Berazî kî eslê xo Kobanêyij o, 1994 de Serêkaniyê de dest pê xebatanê muzîkî kerd. Berazîyê ke perwerdeyê xo yo verên yê muzîkî şarîro kurd û muzîsyen Bê Biharî ra girewt, dima ra sere de tef cinayîşê xeylê enstruman mûsa.
Çarçewaya festîvale de ya ke do heta 15 êlule dewam bikero, do derheqê sînema de panelî û di masterclassî bêrê organîzekerdene.
