Komeleya Aşîtîye ya 10ê Teşrîna Verêne, aşme 131. ya Qirkerdena Garê ya Anqarayî de, cayê qirkerdişî de çalakî viraşt û dîyar kerd ke 25ê teşrîna verêne de roniştişê dewaye est o û waşt ke heme sucdarî bêrê cezakerdene.
Komeleya Aşîtîye ya 10ê Teşrîna Verêne, aşme 131. ya Qirkerdena Garê ya Anqarayî de seba vîrardişê qurbanan, cayê qirkerdişî de eşkerayîyêke da. Endamê komeleye û keyeyê qurbanan tewrê eşkerayîye bîyî. Eşkerayîye de pankartê fotografanê qurbanan ame berzkerdene û sloganê “10ê Teşrîna Verêne vîr mekerê, medinê vîrkerdene”, “Aşîtî a nika” û “Rojêk bêro do kiştoxî hesab bidê” berz kerd. Eşkerayîye seba vîrardişê qurbanan bi deqîqeyêka rêzgirewtişî dest pêkerd.
‘Ganî heme berpirsîyarî bêrê muhakemekerdene’
Hemverfekê Komeleya Îshak Kocabiyikî eşkerayîye de qisey kerd û dîyar kerd ke girewtena tayê berpirsîyaranê qirkerdişî muhîm a la ganî heme berpirsîyarî bêrê girewtene û wina vat: ” 11 serrî yo ke dejê ma nêqedîyayo, sey roja verêne newe yo. Verê nikayîne zî semedê ke hewcedarîya ma bi aşîtîye estbî, ma ameyê na qade. Ma 104 embazê xo tîya de vîndî kerd. A roje ra heta ewro ma têkoşînê aşîtîye domnenê. Seba ke edalet bêro caardene, ma têkoşînê xo domnenê. La rayedar û berpirsîyarî waştişanê ma nêeşnawenê. Edalet nêno caardene. 25ê na aşme de roniştişê dewaye est o. Aşma hezîrane de versucê nê qirkerdişî Omer Denîz Dundar ame muhakemekerdene. Sucdarê nê qirkerdişî ra yew zî Savaş Yildiz bi û Iraq de ame girewtene û tîya rê ame erşawitene. O kes tena berpirsê nê qirkerdişî nîyo, eynî wextî de berpirsê Qirkerdişê Pirsûsî û bombekerdena mîtînga HDP’yî yê Amedî zî yo. Tecrubeyanê 11 serranê dewaye ra bawerîyê ma rayedaran rê nêmenda. O kes hema zî sey ‘ciwananê bi hêrs’ yeno vînayene. Girewtişê ê fîraran averşîyayîşê pozîtîf ê. Nika prosesê aşîtîye est o. Bawerîya ma bi nê prosesî est a. Xeripîyayîşê prosesê 2015î, seba prosesê ewroyînî guman ma rê virazeno. Ganî sucdarî hem warê sîyasî de û hem zî ê ke nê qirkerdişî plan kerdbî, heme bêrê muhakemekerdene.”
