Îzmîr – Mehmet Saît Yildirim ê 74 salî ku ji sala 1995an ve girtî ye û tevî cezayê lê hatiye birîn teman kiriye, ji ber ferzkirina poşmantiyê qebûl nake, nayê bardan. Mehmet Saît Yildirim rojên derbasbûyî de krîza dil derbas kir û tevî nexweşiyên xwe yên giran dîsa şandin girtîgehê. Nûnera ÎHDê ya Îzmîrê Vetha Aydin diyar kir ku biryarên Lijneyên Îdare û Çavdêriyê ne qanûnî ne û da zanîn ku ji bo berdana girtiyên nexweş pêwîstî bi qanûnên nû nîn in.
Mehmet Saît Yildirimê e ji sala 1995an ve girtî ye û 74 salî ye, niha li Tîpa F yê ya Girtîgeha Kiriklar a Îzmîrê tê ragirtin. Ew bi salan e li dijî nexweşiyên dil, genetîk û kronîk, fitiqa stû, tansiyona bilind, nexweşiyên dil, KOAH, nexweşiyên pişikê û hişkbûna damaran re têdikoşe. Tevî ku cezayê ku lê birîne di 27ê Sibata 2025an de qediyaye jî bi hinceta ferzkirina poşmaniyê ya Lijneya Îdare û Çavdêriyê ya Girtîgehê qebûl nake, nayê berdan û cara sêyemîn berdana wî hat taloqkirin.
Lijneya Îdare û Çavdêriyê di 25ê Tebaxê de cara 3yemîn poşmantî li Mehmet Saît Yildirim piştî ferz kirin û lewma jî biryara taloqkirina ceza da. Mehmet Saît krîza dil derbas kir û 26ê Tebaxê li Nexşexaneya Bajêr a Îzmîrê hate anjiyokirin û 2 stent li dilê wî dan. Baroya Îzmîrê di bin çavdêriya bijîşkan de çû serdana Mehmet Saît Yildirim. Baro piştre ragihand ku Mehmet Saît Yildirim li ser nivînên xwe hatiye kelempçekirin. Mehmet Saît Yildirim piştî pêvajoya dermankirinê di 28ê Tebaxê de car din şandin girtîgehê.
Nûnera Herêma Îzmîrê ya Komeleya Mafê Mirovan (ÎHD) a Vetha Aydin derbarê girtiyê nexweş Mehmet Saît Yildirim de axivî.
‘Biryarên Lijneyên Îdare û Çavdêriyê ne qanûnî ne’
Vetha Aydinê da zanîn ku wan di 1ê Îlonê de li girtîgehê hevdîtin bi Saît Yildirim re pêk aniye, nexweşiyên wî hêj jî giran in. Vetha Aydin bilêv kir k ji bo berdana Mehmet Saît Yildirim serlêdanên wan didomin û wiha got: “Lijneya Îdare û Çavdêriyê li gorî kêfa xwe tevdigere û ji ber ku biryarên wan ne objektîf in û ne li gorî qanûnan in, divê ev lijne ji roja ewil ve hatibûna rakirin. Ji ber ku bi salan e destûr tê dayîn ku ev lijne bêyî ku hesabê bidin, li gorî serê xwe tevbigere.”
‘Ji bo berdana girtiyên nexweş pêwîstî bi qanûnên nû nîn e’
Vetha Aydinê destnîşan kir ku Lijneya Îdare û Çavdêriyê li Mehmet Saît Yildirim poşmaniyê ferz dike, lê belê di hiqûqa Tirkiyeyê de û di hiqûqa navneteweyî de tişteke wisa nîn e û got: “Lijne girtiyan wekî ‘terorîst’ û ‘sûcdar’ dibîne û hîn jî li gel Pêvajoya Aştî û Civaka Demokratîk, ev nêrîn neterikandine; poşmantiyê li girtiyên ku cezayê xwe temam kirine jî tê ferzkirin. Heke ev girtî ji kiryarên xwe poşman bûna evqas sal di girtîgehê nediman û her wiha ji bo berdana girtiyên nexweş ne pêwîstî bi qanûna çarçoveyî û ne jî bi qanûneke nû heye, tenê bicîhanîna qanûnên heyî bes e. Lê dîsa jî rêya berdana girtiyên nexweş nayê vekirin.”
‘Dewlet ji bo aştiyê bi erka xwe ranabe’
Di dawiya axaftina xwe de Vetha Aydinê diyar kir ku ew sekinandina şer erenî dibînin, tenê bi sekinandina şer, hemû pirsgirêk nayên çareserkirin û got: “Divê di serî de girtiyên nexweş bên berdan û ji bo girtî tevli siyaseta demokratîk bibin, rê li ber wan bê vekirin. Divê mafên Kurdan ên bingehîn di destûrê de bên mîsogerkirin. Her wiha ev sed sal e siyaseta Tirkiyeyê li ser dijminatiya Kurdan ava bûye û ji bo berevajîkirina vê yekê bareke mezin dikeve li ser milê dewletê, lê mixabin dewlet bi erka xwe ranabe.”
